൭. സൂചിദായകത്ഥേരഅപദാനവണ്ണനാ

തിംസകപ്പസഹസ്സമ്ഹീതിആദികം ആയസ്മതോ സൂചിദായകത്ഥേരസ്സ അപദാനം. അയമ്പി പുരിമജിനവരേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ സുമേധസ്സ ഭഗവതോ കാലേ ഏകസ്മിം കുലഗേഹേ നിബ്ബത്തോ വുദ്ധിമന്വായ ഭഗവതോ ചീവരകമ്മം കാതും പഞ്ച സൂചിയോ അദാസി. സോ തേന പുഞ്ഞേന ദേവമനുസ്സേസു പുഞ്ഞമനുഭവിത്വാ വിചരന്തോ ഉപ്പന്നുപ്പന്നഭവേ തിക്ഖപഞ്ഞോ ഹുത്വാ പാകടോ ഇമസ്മിം ബുദ്ധുപ്പാദേ ഏകസ്മിം കുലഗേഹേ നിബ്ബത്തോ വുദ്ധിമന്വായ സത്ഥരി പസീദിത്വാ പബ്ബജന്തോ തിക്ഖപഞ്ഞതായ ഖുരഗ്ഗേയേവ അരഹത്തം പാപുണി.

൩൦. സോ അപരഭാഗേ പുഞ്ഞം പച്ചവേക്ഖന്തോ തം ദിസ്വാ സോമനസ്സജാതോ പുബ്ബചരിതാപദാനം പകാസേന്തോ തിംസകപ്പസഹസ്സമ്ഹീതിആദിമാഹ. അന്തരന്തരം പനേത്ഥ സുവിഞ്ഞേയ്യമേവ.

൩൧. പഞ്ചസൂചീ മയാ ദിന്നാതി ഏത്ഥ സൂചതി ഛിദ്ദം കരോതി വിജ്ഝതീതി സൂചി, പഞ്ചമത്താ സൂചീ പഞ്ചസൂചീ മയാ ദിന്നാതി അത്ഥോ. സേസം സുവിഞ്ഞേയ്യമേവാതി.

സൂചിദായകത്ഥേരഅപദാനവണ്ണനാ സമത്താ.