൮. പാടലിപുപ്ഫിയത്ഥേരഅപദാനവണ്ണനാ

സുവണ്ണവണ്ണം സമ്ബുദ്ധന്തിആദികം ആയസ്മതോ പാടലിപുപ്ഫിയത്ഥേരസ്സ അപദാനം. അയമ്പി പുരിമജിനവരേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ തിസ്സസ്സ ഭഗവതോ കാലേ ഏകസ്മിം കുലഗേഹേ സേട്ഠിപുത്തോ ഹുത്വാ നിബ്ബത്തോ വുദ്ധിപ്പത്തോ കുസലാകുസലഞ്ഞൂ സത്ഥരി പസീദിത്വാ പാടലിപുപ്ഫം ഗഹേത്വാ സത്ഥു പൂജേസി. സോ തേന പുഞ്ഞേന ബഹുധാ സുഖസമ്പത്തിയോ അനുഭവന്തോ ദേവമനുസ്സേസു സംസരന്തോ ഇമസ്മിം ബുദ്ധുപ്പാദേ കുലഗേഹേ നിബ്ബത്തോ വുദ്ധിമന്വായ സത്ഥരി പസന്നോ പബ്ബജിത്വാ നചിരസ്സേവ അരഹാ അഹോസി.

൩൬. സോ അപരഭാഗേ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ സുവണ്ണവണ്ണം സമ്ബുദ്ധന്തിആദിമാഹ. തത്ഥ അന്തരാപണേതി ആ സമന്തതോ ഹിരഞ്ഞസുവണ്ണാദികം ഭണ്ഡം പണേന്തി വിക്കിണന്തി പത്ഥരന്തി ഏത്ഥാതി ആപണം, ആപണസ്സ അന്തരം വീഥീതി അന്തരാപണം, തസ്മിം അന്തരാപണേ. സുവണ്ണവണ്ണം കഞ്ചനഗ്ഘിയസംകാസം ദ്വത്തിംസവരലക്ഖണം സമ്ബുദ്ധം ദിസ്വാ പാടലിപുപ്ഫം പൂജേസിന്തി അത്ഥോ. സേസം സബ്ബത്ഥ ഉത്താനത്ഥമേവാതി.

പാടലിപുപ്ഫിയത്ഥേരഅപദാനവണ്ണനാ സമത്താ.