൬. തിണസന്ഥരദായകത്ഥേരഅപദാനവണ്ണനാ

ഹിമവന്തസ്സാവിദൂരേതിആദികം ആയസ്മതോ തിണസന്ഥരദായകത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ തിസ്സസ്സ ഭഗവതോ കാലേ ഏകസ്മിം കുലഗേഹേ നിബ്ബത്തോ ബുദ്ധുപ്പാദതോ പഗേവ ഉപ്പന്നത്താ ഘരാവാസം പഹായ താപസപബ്ബജ്ജം പബ്ബജിത്വാ ഹിമവന്തസ്സ അവിദൂരേ ഏകം സരം നിസ്സായ പടിവസതി. തസ്മിം സമയേ തിസ്സോ ഭഗവാ തസ്സാനുകമ്പായ ആകാസേന അഗമാസി. അഥ ഖോ സോ താപസോ ആകാസതോ ഓരുയ്ഹ ഠിതം തം ഭഗവന്തം ദിസ്വാ പസന്നമാനസോ തിണം ലായിത്വാ തിണസന്ഥരം കത്വാ നിസീദാപേത്വാ ബഹുമാനാദരേന പഞ്ചപതിട്ഠിതേന വന്ദിത്വാ പടികുടികോ ഹുത്വാ പക്കാമി. സോ യാവതായുകം ഠത്വാ തതോ ചവിത്വാ ദേവമനുസ്സേസു സംസരന്തോ അനേകവിധസമ്പത്തിം അനുഭവിത്വാ ഇമസ്മിം ബുദ്ധുപ്പാദേ ഏകസ്മിം കുലഗേഹേ നിബ്ബത്തോ വുദ്ധിപ്പത്തോ സത്ഥരി പസീദിത്വാ പബ്ബജിതോ നചിരസ്സേവ അരഹാ അഹോസി.

൨൨. സോ അപരഭാഗേ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ ഹിമവന്തസ്സാവിദൂരേതിആദിമാഹ. തം ഹേട്ഠാ വുത്തത്ഥമേവ. മഹാജാതസ്സരോതി ഏത്ഥ പന സരന്തി ഏത്ഥ പാനീയത്ഥികാ ദ്വിപദചതുപ്പദാദയോ സത്താതി സരം, അഥ വാ സരന്തി ഏത്ഥ നദീകന്ദരാദയോതി സരം, മഹന്തോ ച സോ സയമേവ ജാതത്താ സരോ ചേതി മഹാജാതസ്സരോ. അനോതത്തഛദ്ദന്തദഹാദയോ വിയ അപാകടനാമത്താ ‘‘മഹാജാതസ്സരോ’’തി വുത്തോതി ദട്ഠബ്ബോ. സതപത്തേഹി സഞ്ഛന്നോതി ഏകേകസ്മിം പുപ്ഫേ സതസതപത്താനം വസേന സതപത്തോ, സതപത്തസേതപദുമേഹി സഞ്ഛന്നോ ഗഹനീഭൂതോതി അത്ഥോ. നാനാസകുണമാലയോതി അനേകേ ഹംസകുക്കുടകുക്കുഹദേണ്ഡിഭാദയോ ഏകതോ കുണന്തി സദ്ദം കരോന്തീതി സകുണാതി ലദ്ധനാമാനം പക്ഖീനം ആലയോ ആധാരഭൂതോതി അത്ഥോ. സേസം സബ്ബത്ഥ ഉത്താനത്ഥമേവാതി.

തിണസന്ഥരദായകത്ഥേരഅപദാനവണ്ണനാ സമത്താ.