൯. പദുമത്ഥേരഅപദാനവണ്ണനാ

ചതുസച്ചം പകാസേന്തോതിആദികം ആയസ്മതോ പദുമത്ഥേരസ്സ അപദാനം. അയമ്പി പുരിമബുദ്ധേസു കതകുസലസമ്ഭാരോ പദുമുത്തരമുനിനാ ധമ്മപജ്ജോതേ ജോതമാനേ ഏകസ്മിം കുലഗേഹേ നിബ്ബത്തോ ഘരാവാസം സണ്ഠപേത്വാ ഭോഗസമ്പന്നോതി പാകടോ. സോ സത്ഥരി പസീദിത്വാ മഹാജനേന സദ്ധിം ധമ്മം സുണന്തോ ധജേന സഹ പദുമകലാപം ഗഹേത്വാ അട്ഠാസി, സധജം തം പദുമകലാപം ആകാസമുക്ഖിപിം, തം അച്ഛരിയം ദിസ്വാ അതിവിയ സോമനസ്സജാതോ അഹോസി. സോ യാവജീവം കുസലം കത്വാ ജീവിതപരിയോസാനേ സഗ്ഗേ നിബ്ബത്തോ ധജമിവ ഛകാമാവചരേ പാകടോ പൂജിതോ ച ദിബ്ബസമ്പത്തിമനുഭവിത്വാ മനുസ്സേസു ച ചക്കവത്തിസമ്പത്തിമനുഭവിത്വാ ഇമസ്മിം ബുദ്ധുപ്പാദേ വിഭവസമ്പന്നേ സദ്ധാസമ്പന്നേ ഏകസ്മിം കുലഗേഹേ നിബ്ബത്തോ വുദ്ധിമന്വായ സദ്ധാജാതോ പഞ്ചവസ്സികോവ പബ്ബജിത്വാ നചിരസ്സേവ അരഹാ ഹുത്വാ കതപുഞ്ഞനാമേന പദുമത്ഥേരോതി പാകടോ.

൬൭. അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ ചതുസച്ചം പകാസേന്തോതിആദിമാഹ. തത്ഥ സച്ചന്തി തഥം അവിതഥം അവിപരീതം സച്ചം, ദുക്ഖസമുദയനിരോധമഗ്ഗവസേന ചത്താരി സച്ചാനി സമാഹടാനീതി ചതുസച്ചം, തം ചതുസച്ചം പകാസേന്തോ ലോകേ പാകടം കരോന്തോതി അത്ഥോ. വരധമ്മപ്പവത്തകോതി ഉത്തമധമ്മപ്പവത്തകോ പകാസകോതി അത്ഥോ. അമതം വുട്ഠിന്തി അമതമഹാനിബ്ബാനവുട്ഠിധാരം പവസ്സന്തോ പഗ്ഘരന്തോ സദേവകം ലോകം തേമേന്തോ സബ്ബകിലേസപരിളാഹം നിബ്ബാപേന്തോ ധമ്മവസ്സം വസ്സതീതി അത്ഥോ.

൬൮. സധജം പദുമം ഗയ്ഹാതി ധജേന സഹ ഏകതോ കത്വാ പദുമം പദുമകലാപം ഗഹേത്വാതി അത്ഥോ. അഡ്ഢകോസേ ഠിതോ അഹന്തി ഉഭോ ഉക്ഖിപിത്വാ ഠിതോ അഹന്തി അത്ഥോ. സേസം സബ്ബത്ഥ ഉത്താനത്ഥമേവാതി.

പദുമത്ഥേരഅപദാനവണ്ണനാ സമത്താ.