൧൦. അസനബോധിയത്ഥേരഅപദാനവണ്ണനാ

ജാതിയാ സത്തവസ്സോഹന്തിആദികം ആയസ്മതോ അസനബോധിയത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ തിസ്സസ്സ ഭഗവതോ കാലേ അഞ്ഞതരസ്മിം കുലഗേഹേ നിബ്ബത്തോ വുദ്ധിപ്പത്തോ സുഖപ്പത്തോ സാസനേ പസന്നോ അസനബോധിതോ ഫലം ഗഹേത്വാ തതോ വുട്ഠിതബോധിതരുണേ ഗഹേത്വാ ബോധിം രോപേസി, യഥാ ന വിനസ്സതി തഥാ ഉദകാസിഞ്ചനാദികമ്മേന രക്ഖിത്വാ പൂജേസി. സോ തേന പുഞ്ഞേന ദേവമനുസ്സേസു സമ്പത്തിയോ അനുഭവിത്വാ ഇമസ്മിം ബുദ്ധുപ്പാദേ കുലഗേഹേ നിബ്ബത്തോ പരിപക്കസമ്ഭാരത്താ സത്തവസ്സികോവ സമാനോ പബ്ബജിത്വാ ഖുരഗ്ഗേയേവ അരഹത്തം പാപുണി, പുരാകതപുഞ്ഞനാമേന അസനബോധിയത്ഥേരോതി പാകടോ.

൭൮. സോ പുബ്ബസമ്ഭാരമനുസ്സരിത്വാ സോമനസ്സജാതോ പുബ്ബചരിതാപദാനം പകാസേന്തോ ജാതിയാ സത്തവസ്സോഹന്തിആദിമാഹ. തത്ഥ ജാതിയാതി മാതുഗബ്ഭതോ നിക്ഖന്തകാലതോ പട്ഠായാതി അത്ഥോ. സത്തവസ്സോ പരിപുണ്ണസരദോ അഹം ലോകനായകം തിസ്സം ഭഗവന്തം അദ്ദസന്തി സമ്ബന്ധോ. പസന്നചിത്തോ സുമനോതി പകാരേന പസന്നഅനാലുളിതഅവികമ്പിതചിത്തോ, സുമനോ സുന്ദരമനോ സോമനസ്സസഹഗതചിത്തോതി അത്ഥോ.

൭൯. തിസ്സസ്സാഹം ഭഗവതോതി തിക്ഖത്തും ജാതോതി തിസ്സോ, സോ മാതുഗബ്ഭതോ, മനുസ്സജാതിതോ, പഞ്ചക്ഖന്ധതോ ച മുത്തോ ഹുത്വാ ജാതോ നിബ്ബത്തോ ബുദ്ധോ ജാതോതി അത്ഥോ. തസ്സ തിസ്സസ്സ ഭഗവതോ താദിനോ, ലോകജേട്ഠസ്സ അസനബോധിം ഉത്തമം രോപയിന്തി സമ്ബന്ധോ.

൮൦. അസനോ നാമധേയ്യേനാതി നാമപഞ്ഞത്തിയാ നാമസഞ്ഞായ അസനോ നാമ അസനരുക്ഖോ ബോധി അഹോസീതി അത്ഥോ. ധരണീരുഹപാദപോതി വല്ലിരുക്ഖപബ്ബതഗങ്ഗാസാഗരാദയോ ധാരേതീതി ധരണീ, കാ സാ? പഥവീ, തസ്സം രുഹതി പതിട്ഠഹതീതി ധരണീരുഹോ, പാദേന പിവതീതി പാദപോ, പാദസങ്ഖാതേന മൂലേന സിഞ്ചിതോദകം പിവതി ആപോരസം സിനേഹം ധാരേതീതി അത്ഥോ. ധരണീരുഹോ ച സോ പാദപോ ചാതി ധരണീരുഹപാദപോ, തം ഉത്തമം അസനം ബോധിം പഞ്ച വസ്സാനി പരിചരിം പോസേസിന്തി അത്ഥോ.

൮൧. പുപ്ഫിതം പാദപം ദിസ്വാതി തം മയാ പോസിതം അസനബോധിരുക്ഖം പുപ്ഫിതം അച്ഛരയോഗ്ഗഭൂതപുപ്ഫത്താ അബ്ഭുതം ലോമഹംസകരണം ദിസ്വാ സകം കമ്മം അത്തനോ കമ്മം പകിത്തേന്തോ പകാരേന കഥയന്തോ ബുദ്ധസേട്ഠസ്സ സന്തികം അഗമാസിന്തി അത്ഥോ. സേസം സബ്ബത്ഥ ഉത്താനത്ഥമേവാതി.

അസനബോധിയത്ഥേരഅപദാനവണ്ണനാ സമത്താ.

ഛട്ഠവഗ്ഗവണ്ണനാ സമത്താ.