൬. സപരിവാരാസനത്ഥേരഅപദാനവണ്ണനാ

പദുമുത്തരബുദ്ധസ്സാതിആദികം ആയസ്മതോ സപരിവാരാസനത്ഥേരസ്സ അപദാനം. സോപി പുരിമബുദ്ധേസു കതാധികാരോ തത്ഥ തത്ഥ ഭവേസു വിവട്ടൂപനിസ്സയാനി പുഞ്ഞാനി ഉപചിനന്തോ പദുമുത്തരസ്സ ഭഗവതോ കാലേ വിഭവസമ്പന്നേ കുലഗേഹേ നിബ്ബത്തോ വുദ്ധിപ്പത്തോ സദ്ധാജാതോ സാസനേ പസന്നോ ദാനഫലം സദ്ദഹന്തോ നാനഗ്ഗരസഭോജനേന ഭഗവതോ പിണ്ഡപാതം അദാസി, ദത്വാ ച പന ഭോജനസാലായം ഭോജനത്ഥായ നിസിന്നാസനം ജാതിസുമനമല്ലികാദീഹി അലങ്കരി. ഭഗവാ ച ഭത്താനുമോദനമകാസി. സോ തേന പുഞ്ഞകമ്മേന ദേവമനുസ്സേസു സംസരന്തോ അനേകവിധം സമ്പത്തിം അനുഭവിത്വാ ഇമസ്മിം ബുദ്ധുപ്പാദേ വിഭവസമ്പന്നേ കുലഗേഹേ നിബ്ബത്തോ വുദ്ധിമന്വായ സദ്ധോ പസന്നോ പബ്ബജിത്വാ ന ചിരസ്സേവ അരഹാ അഹോസി.

൪൩. സോ ഏവം പത്തസന്തിപദോ ‘‘കേന നു ഖോ പുഞ്ഞേന ഇദം സന്തിപദം അനുപ്പത്ത’’ന്തി ഞാണേന ഉപധാരേന്തോ പുബ്ബകമ്മം ദിസ്വാ സോമനസ്സജാതോ പുബ്ബചരിതാപദാനം പകാസേന്തോ പദുമുത്തരബുദ്ധസ്സാതിആദിമാഹ. തം വുത്തത്ഥമേവ. പിണ്ഡപാതം അദാസഹന്തി തത്ഥ തത്ഥ ലദ്ധാനം പിണ്ഡാനം കബളം കബളം കത്വാ പാതബ്ബതോ ഖാദിതബ്ബതോ ആഹാരോ പിണ്ഡപാതോ, തം പിണ്ഡപാതം ഭഗവതോ അദാസിം, ഭഗവന്തം ഭോജേസിന്തി അത്ഥോ.

൪൪. അകിത്തയി പിണ്ഡപാതന്തി മയാ ദിന്നപിണ്ഡപാതസ്സ ഗുണം ആനിസംസം പകാസേസീതി അത്ഥോ.

൪൮. സംവുതോ പാതിമോക്ഖസ്മിന്തി പാതിമോക്ഖസംവരസീലേന സംവുതോ പിഹിതോ പടിച്ഛന്നോതി അത്ഥോ. ഇന്ദ്രിയേസു ച പഞ്ചസൂതി ചക്ഖുന്ദ്രിയാദീസു പഞ്ചസു ഇന്ദ്രിയേസു രൂപാദീഹി ഗോപിതോ ഇന്ദ്രിയസംവരസീലഞ്ച ഗോപിതോതി അത്ഥോ. സേസം സുവിഞ്ഞേയ്യമേവാതി.

സപരിവാരാസനത്ഥേരഅപദാനവണ്ണനാ സമത്താ.