൭. പഞ്ചദീപകത്ഥേരഅപദാനവണ്ണനാ

പദുമുത്തരബുദ്ധസ്സാതിആദികം ആയസ്മതോ പഞ്ചദീപകത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ ഉപ്പന്നുപ്പന്നഭവേസു വിവട്ടൂപനിസ്സയാനി പുഞ്ഞാനി ഉപചിനന്തോ പദുമുത്തരസ്സ ഭഗവതോ കാലേ കുലഗേഹേ നിബ്ബത്തോ വുദ്ധിമന്വായ ഘരാവാസേ വസന്തോ ഭഗവതോ ധമ്മം സുത്വാ സമ്മാദിട്ഠിയം പതിട്ഠിതോ സദ്ധോ പസന്നോ മഹാജനേഹി ബോധിപൂജം കയിരമാനം ദിസ്വാ സയമ്പി ബോധിം പരിവാരേത്വാ ദീപം ജാലേത്വാ പൂജേസി. സോ തേന പുഞ്ഞകമ്മേന ദേവമനുസ്സേസു സംസരന്തോ ചക്കവത്തിസമ്പത്തിആദയോ അനുഭവിത്വാ സബ്ബത്ഥേവ ഉപ്പന്നഭവേ ജലമാനോ ജോതിസമ്പന്നവിമാനാദീസു വസിത്വാ ഇമസ്മിം ബുദ്ധുപ്പാദേ ഏകസ്മിം വിഭവസമ്പന്നേ കുലഗേഹേ നിബ്ബത്തോ വുദ്ധിപ്പത്തോ സദ്ധാജാതോ പബ്ബജിത്വാ നചിരസ്സേവ അരഹാ അഹോസി, ദീപപൂജാനിസ്സന്ദേന ദീപകത്ഥേരോതി പാകടോ.

൫൦. സോ ഏകദിവസം അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ പദുമുത്തരബുദ്ധസ്സാതിആദിമാഹ. തം വുത്തത്ഥമേവ. ഉജുദിട്ഠി അഹോസഹന്തി വങ്കം മിച്ഛാദിട്ഠിം ഛഡ്ഡേത്വാ ഉജു അവങ്കം നിബ്ബാനാഭിമുഖം പാപുണനസമ്മാദിട്ഠി അഹോസിന്തി അത്ഥോ.

൫൧. പദീപദാനം പാദാസിന്തി ഏത്ഥ പകാരേന ദിബ്ബതി ജോതതീതി പദീപോ, തസ്സ ദാനം പദീപദാനം, തം അദാസിം പദീപപൂജം അകാസിന്തി അത്ഥോ. സേസം സബ്ബത്ഥ ഉത്താനത്ഥമേവാതി.

പഞ്ചദീപകത്ഥേരഅപദാനവണ്ണനാ സമത്താ.