൩. ഗയാകസ്സപത്ഥേരഅപദാനവണ്ണനാ

തതിയാപദാനേ അജിനചമ്മവത്ഥോഹന്തിആദികം ആയസ്മതോ ഗയാകസ്സപത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയം കുസലം ഉപചിനന്തോ ഇതോ ഏകതിംസകപ്പേ സിഖിസ്സ ഭഗവതോ കാലേ കുലഗേഹേ നിബ്ബത്തോ വിഞ്ഞുതം പത്തോ നിസ്സരണജ്ഝാസയതായ ഘരാവാസം പഹായ താപസപബ്ബജ്ജം പബ്ബജിത്വാ അരഞ്ഞായതനേ അസ്സമം മാപേത്വാ വനമൂലഫലാഹാരോ വസതി. തേന ച സമയേന ഭഗവാ ഏകോ അദുതിയോ തസ്സ അസ്സമസമീപേനാഗച്ഛി, സോ ഭഗവന്തം ദിസ്വാ പസന്നമാനസോ ഉപസങ്കമിത്വാ വന്ദിത്വാ ഏകമന്തം ഠിതോ വേലം ഓലോകേന്തോ മനോഹരാനി കോലഫലാനി സത്ഥു ഉപനേസി. സോ തേന പുഞ്ഞകമ്മേന ദേവമനുസ്സേസു സംസരന്തോ ഇമസ്മിം ബുദ്ധുപ്പാദേ ബ്രാഹ്മണകുലേ നിബ്ബത്തിത്വാ വയപ്പത്തോ നിസ്സരണജ്ഝാസയതായ ഘരാവാസം പഹായ താപസപബ്ബജ്ജം പബ്ബജിത്വാ ദ്വീഹി താപസസതേഹി സദ്ധിം ഗയായ വിഹരതി. ഗയായ വസനതോ ഹിസ്സ കസ്സപഗോത്തതായ ച ഗയാകസ്സപോതി സമഞ്ഞാ അഹോസി. സോ ഭഗവതോ സദ്ധിം പരിസായ ഏഹിഭിക്ഖൂപസമ്പദം ദത്വാ നദീകസ്സപസ്സ വുത്തനയേന ആദിത്തപരിയായ ദേസനായ ഓവദിയമാനോ അരഹത്തേ പതിട്ഠാസി.

൩൫. സോ അരഹത്തം പത്വാ സോമനസ്സജാതോ അത്തനോ പുബ്ബചരിതാപദാനം പകാസേന്തോ അജിനചമ്മവത്ഥോഹന്തിആദിമാഹ. തത്ഥ അജിനചമ്മവത്ഥോതി താപസപബ്ബജിതത്താ അജിനചമ്മനിവാസനപാവുരണോതി അത്ഥോ. ഖാരിഭാരധരോതി താപസകാലേ താപസപരിക്ഖാരപരിപുണ്ണകാജധരോതി അത്ഥോ. ഖാരികതാപസപരിക്ഖാരേ പൂരേത്വാ. കോലം അഹാസി അസ്സമന്തി കോലഫലം അസ്സമേ പൂരേത്വാ അസ്സമേ നിസിന്നോതി അത്ഥോ. അഗോപയിന്തി പാഠേ കോലഫലം പരിയേസിത്വാ അസ്സമം ഗോപേസിം രക്ഖിന്തി അത്ഥോ. സേസം സബ്ബം ഉത്താനത്ഥമേവാതി.

ഗയാകസ്സപത്ഥേരഅപദാനവണ്ണനാ സമത്താ.