൪. കിമിലത്ഥേരഅപദാനവണ്ണനാ

ചതുത്ഥാപദാനേ നിബ്ബുതേ കകുസന്ധമ്ഹീതിആദികം ആയസ്മതോ കിമിലത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ കകുസന്ധസ്സ ഭഗവതോ കാലേ കുലഗേഹേ നിബ്ബത്തിത്വാ വിഞ്ഞുതം പത്തോ പരിനിബ്ബുതേ സത്ഥരി തസ്സ ധാതുയോ ഉദ്ദിസ്സ സലലമാലാഹി മണ്ഡപം കാരേത്വാ പൂജം അകാസി. സോ തേന പുഞ്ഞകമ്മേന താവതിംസേസു ഉപ്പജ്ജിത്വാ അപരാപരം ദേവമനുസ്സേസു സംസരന്തോ ഇമസ്മിം ബുദ്ധുപ്പാദേ കപിലവത്ഥുനഗരേ സക്യരാജകുലേ നിബ്ബത്തിത്വാ കിമിലോതി തസ്സ നാമം അകാസി. സോ വയപ്പത്തോ ഭോഗസമ്പത്തിയാ പമത്തോ വിഹരതി. തസ്സ ഞാണപരിപാകം ഞത്വാ സംവേഗജനനത്ഥം അനുപിയായം വിഹരന്തോ സത്ഥാ പഠമയോബ്ബനേ ഠിതം രമണീയം ഇത്ഥിരൂപം അഭിനിമ്മിനിത്വാ പുരതോ ദസ്സേത്വാ പുന അനുക്കമേന യഥാ ജരാരോഗവിപത്തീഹി അഭിഭൂതാ ദിസ്സതി, തഥാ അകാസി. തം ദിസ്വാ കിമിലകുമാരോ അതിവിയ സംവേഗജാതോ അത്തനോ സംവേഗം പകാസേന്തോ ഭഗവതോ പാകടം കത്വാ ലദ്ധാനുസാസനോ അരഹത്തം പാപുണി.

൪൨. സോ അരഹത്തം പത്വാ സോമനസ്സജാതോ അത്തനോ പുബ്ബചരിതാപദാനം പകാസേന്തോ നിബ്ബുതേ കകുസന്ധമ്ഹീതിആദിമാഹ. ബ്രാഹ്മണമ്ഹി വുസീമതീതി പഞ്ചഹി വസിതാഹി വസിപ്പത്തമ്ഹി ഭഗവതി. ബ്രാഹ്മണസ്സ സബ്ബഗുണഗണേഹി മണ്ഡിതത്താ അഭിവൂള്ഹീതത്താ ബ്രാഹ്മണമ്ഹി കകുസന്ധേ ഭഗവതി പരിനിബ്ബുതേതി അത്ഥോ. സേസം സബ്ബം ഉത്താനമേവാതി.

കിമിലത്ഥേരഅപദാനവണ്ണനാ സമത്താ.