൭. അഭയത്ഥേരഅപദാനവണ്ണനാ

സത്തമാപദാനേ പദുമുത്തരോ നാമ ജിനോതിആദികം ആയസ്മതോ അഭയത്ഥേരസ്സ അപദാനം. അയമ്പി പുരിമജിനവരേസു കതാധികാരോ തത്ഥ തത്ഥ ഭവേ വിപട്ടൂപനിസ്സയാനി പുഞ്ഞാനി ഉപചിനന്തോ പദുമുത്തരസ്സ ഭഗവതോ കാലേ ഹംസവതീനഗരേ ബ്രാഹ്മണകുലേ നിബ്ബത്തോ. സോ വുദ്ധിമന്വായ വേദങ്ഗപാരഗോ സകപരസമയകുസലോ ഏകദിവസം സത്ഥു ധമ്മദേസനം സുത്വാ പസന്നമാനസോ ഭഗവന്തം ഗാഥാഹി ഥോമേസി. സോ തത്ഥ യാവതായുകം ഠത്വാ പുഞ്ഞാനി കത്വാ തതോ ചുതോ ദേവലോകേ നിബ്ബത്തോ അപരാപരം സുഗതീസുയേവം സംസരന്തോ ഇമസ്മിം ബുദ്ധുപ്പാദേ രാജഗഹേ ബിമ്ബിസാരരഞ്ഞോ പുത്തോ ഹുത്വാ നിബ്ബത്തി, അഭയോത്വേവസ്സ നാമം കരിംസു. സോ വയപ്പത്തോ നിഗണ്ഠേഹി സദ്ധിം വിസ്സാസികോ ഹുത്വാ ചരന്തോ ഏകദിവസം നിഗണ്ഠേന നാടപുത്തേന സത്ഥു വാദാരോപനത്ഥായ പേസിതോ നിപുണപഞ്ഹം പുച്ഛിത്വാ നിപുണബ്യാകരണം സുത്വാ പസന്നോ സത്ഥു സന്തികേ പബ്ബജിത്വാ കമ്മട്ഠാനാനുരൂപം ഞാണം പേസേത്വാ നചിരസ്സേവ അരഹത്തം പാപുണി.

൧൯൫. സോ അരഹത്തം പത്വാ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ പദുമുത്തരോ നാമ ജിനോതിആദിമാഹ. തം സബ്ബം സുവിഞ്ഞേയ്യമേവാതി.

അഭയത്ഥേരഅപദാനവണ്ണനാ സമത്താ.