൭. ഏകദീപിയത്ഥേരഅപദാനവണ്ണനാ

പദുമുത്തരസ്സ മുനിനോതിആദികം ആയസ്മതോ ഏകദീപിയത്ഥേരസ്സ അപദാനം. അയമ്പായസ്മാ പുരിമജിനസേട്ഠേസു കതകുസലസമ്ഭാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ പദുമുത്തരസ്സ ഭഗവതോ കാലേ ഗഹപതികുലേ നിബ്ബത്തോ വുദ്ധിപ്പത്തോ സദ്ധോ പസന്നോ ഭഗവതോ സലലമഹാബോധിമ്ഹി ഏകപദീപം പൂജേസി, ഥാവരം കത്വാ നിച്ചമേകപദീപപൂജനത്ഥായ തേലവട്ടം പട്ഠപേസി. സോ തേന പുഞ്ഞേന ദേവമനുസ്സേസു സംസരന്തോ സബ്ബത്ഥ ജലമാനോ പസന്നചക്ഖുകോ ഉഭയസുഖമനുഭവിത്വാ ഇമസ്മിം ബുദ്ധുപ്പാദേ സാവത്ഥിയം വിഭവസമ്പന്നേ ഏകസ്മിം കുലേ നിബ്ബത്തോ വിഞ്ഞുതം പത്തോ രതനത്തയേ പസന്നോ പബ്ബജിത്വാ നചിരസ്സേവ അരഹത്തം പത്തോ ദീപപൂജായ ലദ്ധവിസേസാധിഗമത്താ ഏകദീപിയത്ഥേരോതി പാകടോ.

൩൦. സോ അപരഭാഗേ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ പദുമുത്തരസ്സ മുനിനോതിആദിമാഹ. തം സബ്ബം ഉത്താനത്ഥമേവാതി.

ഏകദീപിയത്ഥേരഅപദാനവണ്ണനാ സമത്താ.