൭. അത്ഥസന്ദസ്സകത്ഥേരഅപദാനവണ്ണനാ

വിസാലമാളേ ആസീനോതിആദികം ആയസ്മതോ അത്ഥസന്ദസ്സകത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ അനേകേസു അത്തഭാവേസു കതപുഞ്ഞൂപചയോ പദുമുത്തരസ്സ ഭഗവതോ കാലേ ബ്രാഹ്മണകുലേ നിബ്ബത്തോ വുദ്ധിമന്വായ സകസിപ്പേസു നിപ്ഫത്തിം പത്തോ തത്ഥ സാരം അപസ്സന്തോ ഗേഹം പഹായ ഹിമവന്തം ഗന്ത്വാ രമണീയേ ഠാനേ പണ്ണസാലം കത്വാ പടിവസതി, തദാ സത്താനുകമ്പായ ഹിമവന്തമാഗതം പദുമുത്തരഭഗവന്തം ദിസ്വാ പസന്നമാനസോ പഞ്ചങ്ഗസമന്നാഗതോ വന്ദിത്വാ ഥുതിവചനേഹി ഥോമേസി. സോ തേന പുഞ്ഞേന യാവതായുകം കത്വാ കാലങ്കത്വാ ബ്രഹ്മലോകൂപഗോ അഹോസി. സോ അപരഭാഗേ ഇമസ്മിം ബുദ്ധുപ്പാദേ കുലഗേഹേ നിബ്ബത്തോ വിഞ്ഞുതം പത്തോ സത്ഥു ധമ്മദേസനം സുത്വാ പടിലദ്ധസദ്ധോ പബ്ബജിത്വാ അരഹത്തം പാപുണി.

൪൭. സോ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ വിസാലമാളേ ആസീനോതിആദിമാഹ. തത്ഥ വിസാലമാളേതി വിസാലം പത്ഥടം വിത്ഥിണ്ണം മഹന്തം മാളം വിസാലമാളം, തസ്മിം വിസാലമാളേ ആസീനോ നിസിന്നോ അഹം ലോകനായകം അദ്ദസന്തി സമ്ബന്ധോ. തേസം സുവിഞ്ഞേയ്യമേവാതി.

അത്ഥസന്ദസ്സകത്ഥേരഅപദാനവണ്ണനാ സമത്താ.