൮. ഏകപസാദനിയത്ഥേരഅപദാനവണ്ണനാ

നാരദോ ഇതി മേ നാമന്തിആദികം ആയസ്മതോ ഏകപസാദനിയത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ അനേകാസു ജാതീസു കതകുസലോ അത്ഥദസ്സിസ്സ ഭഗവതോ കാലേ ബ്രാഹ്മണകുലേ നിബ്ബത്തോ കേസവോതി പാകടോ ഹുത്വാ വിഞ്ഞുതം പത്വാ ഘരാവാസം പഹായ പബ്ബജിത്വാ വസന്തോ ഏകദിവസം സത്ഥു ധമ്മദേസനം സുത്വാ പസന്നമാനസോ അഞ്ജലിം പഗ്ഗയ്ഹ അതിവിയ പീതിസോമനസ്സജാതോ പക്കാമി. സോ യാവതായുകം ഠത്വാ തേനേവ സോമനസ്സേന കാലം കത്വാ ദേവേസു നിബ്ബത്തോ തത്ഥ ദിബ്ബസമ്പത്തിം അനുഭവിത്വാ മനുസ്സേസു ഉപ്പന്നോ തത്ഥ സമ്പത്തിയോ അനുഭവിത്വാ ഇമസ്മിം ബുദ്ധുപ്പാദേ അഞ്ഞതരസ്മിം കുലഗേഹേ നിബ്ബത്തോ വുദ്ധിപ്പത്തോ സത്ഥരി പസീദിത്വാ പബ്ബജിതോ നചിരസ്സേവ അരഹാ അഹോസി.

൫൫. സോ അപരഭാഗേ അത്തനോ കതകുസലകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ നാരദോ ഇതി മേ നാമന്തിആദിമാഹ. തത്ഥ നാരദോതി ജാതിവസേന സുദ്ധസരീരത്താ നത്ഥി രജോ ധൂലി മലം ഏതസ്സാതി നാരദോ, ജ-കാരസ്സ ദ-കാരം കത്വാ നാരദോതി കുലദത്തികം നാമം. കേസവോതി കിസവച്ഛഗോത്തേ ജാതത്താ കേസവോ നാരദകേസവോ ഇതി മം ജനാ വിദൂ ജാനന്തീതി അത്ഥോ. സേസം പാകടമേവാതി.

ഏകപസാദനിയത്ഥേരഅപദാനവണ്ണനാ സമത്താ.