൫. രഹോസഞ്ഞകത്ഥേരഅപദാനവണ്ണനാ

ഹിമവന്തസ്സാവിദൂരേതിആദികം ആയസ്മതോ രഹോസഞ്ഞകത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ ഏകസ്മിം ബുദ്ധസുഞ്ഞകാലേ മജ്ഝിമദേസേ ബ്രാഹ്മണകുലേ നിബ്ബത്തോ വുദ്ധിമന്വായ സകസിപ്പേസു നിപ്ഫത്തിം പത്വാ തത്ഥ സാരം അപസ്സന്തോ കേവലം ഉദരം പൂരേത്വാ കോധമദമാനാദയോ അകുസലേയേവ ദിസ്വാ ഘരാവാസം പഹായ ഹിമവന്തം പവിസിത്വാ ഇസിപബ്ബജ്ജം പബ്ബജിത്വാ അനേകതാപസസതപരിവാരോ വസഭപബ്ബതസമീപേ അസ്സമം മാപേത്വാ തീണി വസ്സസഹസ്സാനി ഹിമവന്തേയേവ വസമാനോ ‘‘അഹം ഏത്തകാനം സിസ്സാനം ആചരിയോതി സമ്മതോ ഗരുട്ഠാനിയോ ഗരുകാതബ്ബോ വന്ദനീയോ, ആചരിയോ മേ നത്ഥീ’’തി ദോമനസ്സപ്പത്തോ തേ സബ്ബേ സിസ്സേ സന്നിപാതേത്വാ ബുദ്ധാനം അഭാവേ നിബ്ബാനാധിഗമാഭാവം പകാസേത്വാ സയം ഏകകോ രഹോ വിവേകട്ഠാനേവ നിസിന്നോ ബുദ്ധസ്സ സമ്മുഖാ നിസിന്നോ വിയ ബുദ്ധസഞ്ഞം മനസി കരിത്വാ ബുദ്ധാരമ്മണം പീതിം ഉപ്പാദേത്വാ സാലായം പല്ലങ്കം ആഭുജിത്വാ നിസിന്നോ കാലം കത്വാ ബ്രഹ്മലോകേ നിബ്ബത്തി.

൩൪. സോ തത്ഥ ഝാനസുഖേന ചിരം വസിത്വാ ഇമസ്മിം ബുദ്ധുപ്പാദേ കുലഗേഹേ നിബ്ബത്തോ കാമേസു അനല്ലീനോ സത്തവസ്സികോ പബ്ബജിത്വാ ഖുരഗ്ഗേയേവ അരഹത്തം പത്വാ ഛളഭിഞ്ഞോ ഹുത്വാ പുബ്ബേനിവാസഞാണേന അത്തനോ പുബ്ബകമ്മം സരിത്വാ സഞ്ജാതസോമനസ്സോ പുബ്ബചരിതാപദാനം പകാസേന്തോ ഹിമവന്തസ്സാവിദൂരേതിആദിമാഹ. വസഭോ നാമ പബ്ബതോതി ഹിമവന്തപബ്ബതം വിനാ സേസപബ്ബതാനം ഉച്ചതരഭാവേന സേട്ഠതരഭാവേന വസഭോതി സങ്ഖം ഗതോ പബ്ബതോതി അത്ഥോ. സേസം സബ്ബത്ഥ ഉത്താനത്ഥമേവാതി.

രഹോസഞ്ഞകത്ഥേരഅപദാനവണ്ണനാ സമത്താ.