൪. പുപ്ഫച്ഛദനിയത്ഥേരഅപദാനവണ്ണനാ

സുനന്ദോ നാമ നാമേനാതിആദികം ആയസ്മതോ പുപ്ഫച്ഛദനിയത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ അനേകേസു ഭവേസു വിവട്ടൂപനിസ്സയാനി പുഞ്ഞാനി ഉപചിനന്തോ പദുമുത്തരസ്സ ഭഗവതോ കാലേ ബ്രാഹ്മണകുലേ നിബ്ബത്തോ വിഞ്ഞുതം പത്വാ സകസിപ്പേസു നിപ്ഫത്തിം പത്തോ മഹാഭോഗോ മഹായസോ ദാനാഭിരതോ അഹോസി. ഏകദിവസം സോ ‘‘സകലജമ്ബുദീപേ ഇമേ യാചകാ നാമ ‘അഹം ദാനം ന ലദ്ധോസ്മീ’തി വത്തും മാ ലഭന്തൂ’’തി മഹാദാനം സജ്ജേസി. തദാ പദുമുത്തരോ ഭഗവാ സപരിവാരോ ആകാസേന ഗച്ഛതി. ബ്രാഹ്മണോ തം ദിസ്വാ പസന്നചിത്തോ സകസിസ്സേ പക്കോസാപേത്വാ പുപ്ഫാനി ആഹരാപേത്വാ ആകാസേ ഉക്ഖിപിത്വാ പൂജേസി. താനി സകലനഗരം ഛാദേത്വാ സത്ത ദിവസാനി അട്ഠംസു.

൨൬. സോ തേന പുഞ്ഞകമ്മേന ദേവമനുസ്സേസു സുഖം അനുഭവിത്വാ ഇമസ്മിം ബുദ്ധുപ്പാദേ സാവത്ഥിയം ഏകസ്മിം കുലഗേഹേ നിബ്ബത്തോ സദ്ധാജാതോ പബ്ബജിത്വാ ഖുരഗ്ഗേയേവ അരഹത്തം പത്വാ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ സുനന്ദോ നാമ നാമേനാതിആദിമാഹ. തം ഹേട്ഠാ വുത്തനയത്താ സുവിഞ്ഞേയ്യമേവാതി.

പുപ്ഫച്ഛദനിയത്ഥേരഅപദാനവണ്ണനാ സമത്താ.