൭. ഫലദായകത്ഥേരഅപദാനവണ്ണനാ

അജ്ഝായകോ മന്തധരോതിആദികം ആയസ്മതോ ഫലദായകത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ അനേകേസു ഭവേസു വിവട്ടൂപനിസ്സയാനി പുഞ്ഞാനി ഉപചിനന്തോ പദുമുത്തരസ്സ ഭഗവതോ കാലേ ബ്രാഹ്മണകുലേ നിബ്ബത്തോ വിഞ്ഞുതം പത്വാ വേദത്തയാദിസകസിപ്പേസു പാരപ്പത്തോ അനേകേസം ബ്രാഹ്മണസഹസ്സാനിം പാമോക്ഖോ ആചരിയോ സകസിപ്പാനം പരിയോസാനം അദിസ്വാ തത്ഥ ച സാരം അപസ്സന്തോ ഘരാവാസം പഹായ ഇസിപബ്ബജ്ജം പബ്ബജിത്വാ ഹിമവന്തസ്സ അവിദൂരേ അസ്സമം കാരേത്വാ സഹ സിസ്സേഹി വാസം കപ്പേസി, തസ്മിം സമയേ പദുമുത്തരോ ഭഗവാ ഭിക്ഖായ ചരമാനോ തസ്സാനുകമ്പായ തം പദേസം സമ്പാപുണി. താപസോ ഭഗവന്തം ദിസ്വാ പസന്നമാനസോ അത്തനോ അത്ഥായ പുടകേ നിക്ഖിപിത്വാ രുക്ഖഗ്ഗേ ലഗ്ഗിതാനി മധുരാനി പദുമഫലാനി മധുനാ സഹ അദാസി. ഭഗവാ തസ്സ സോമനസ്സുപ്പാദനത്ഥം പസ്സന്തസ്സേവ പരിഭുഞ്ജിത്വാ ആകാസേ ഠിതോ ഫലദാനാനിസംസം കഥേത്വാ പക്കാമി.

൭൫. സോ തേന പുഞ്ഞേന ദേവമനുസ്സേസു സംസരന്തോ ഉഭയസമ്പത്തിയോ അനുഭവിത്വാ ഇമസ്മിം ബുദ്ധുപ്പാദേ വിഭവസമ്പന്നേ ഏകസ്മിം കുലഗേഹേ നിബ്ബത്തോ സത്തവസ്സികോയേവ അരഹത്തം പത്വാ പുബ്ബേ കതകുസലകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ അജ്ഝായകോ മന്തധരോതിആദിമാഹ. തത്ഥ അജ്ഝേതി ചിന്തേതീതി അജ്ഝായി, അജ്ഝായിയേവ അജ്ഝായകോ. ഏത്ഥ ഹി അകാരോ ‘‘പടിസേധേ വുദ്ധിതബ്ഭാവേ…പേ… അകാരോ വിരഹപ്പകേ’’തി ഏവം വുത്തേസു ദസസു അത്ഥേസു തബ്ഭാവേ വത്തതി. സിസ്സാനം സവനധാരണാദിവസേന ഹിതം അജ്ഝേതി ചിന്തേതി സജ്ഝായം കരോതീതി അജ്ഝായകോ, ചിന്തകോതി അത്ഥോ. ആചരിയസ്സ സന്തികേ ഉഗ്ഗഹിതം സബ്ബം മന്തം മനേന ധാരേതി പവത്തേതീതി മന്തധരോ. തിണ്ണം വേദാന പാരഗൂതി വേദം വുച്ചതി ഞാണം, വേദേന വേദിതബ്ബാ ബുജ്ഝിതബ്ബാതി വേദാ, ഇരുവേദയജുവേദസാമവേദസങ്ഖാതാ തയോ ഗന്ഥാ, തേസം വേദാനം പാരം പരിയോസാനം കോടിം ഗതോ പത്തോതി പാരഗൂ. സേസം പാകടമേവാതി

ഫലദായകത്ഥേരഅപദാനവണ്ണനാ സമത്താ.