൬. കുസുമാസനിയത്ഥേരഅപദാനവണ്ണനാ

നഗരേ ധഞ്ഞവതിയാതിആദികം ആയസ്മതോ കുസുമാസനിയത്ഥേരസ്സ അപദാനം. അയമ്പി പുരിമജിനവരേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ വിപസ്സിസ്സ ഭഗവതോ കാലേ ബ്രാഹ്മണകുലേ നിബ്ബത്തോ വിഞ്ഞുതം പത്തോ മഹദ്ധനോ മഹാഭോഗോ തിണ്ണം വേദാനം പാരം ഗതോ ബ്രാഹ്മണസിപ്പേസു കോടിപ്പത്തോ സകപരസമയകുസലോ മാതാപിതരോ പൂജേതുകാമോ പഞ്ച ഉപ്പലകലാപേ അത്തനോ സമീപേ ഠപേത്വാ നിസിന്നോ ഭിക്ഖുസങ്ഘപരിവുതം വിപസ്സിം ഭഗവന്തം ആഗച്ഛന്തം ദിസ്വാ നീലപീതാദിഘനബുദ്ധരസ്മിയോ ച ദിസ്വാ പസന്നമാനസോ ആസനം പഞ്ഞാപേത്വാ തത്ഥ താനി പുപ്ഫാനി സന്ഥരിത്വാ ഭഗവന്തം തത്ഥ നിസീദാപേത്വാ സകഘരേ മാതു അത്ഥായ പടിയത്താനി സബ്ബാനി ഖാദനീയഭോജനീയാനി ഗഹേത്വാ സപരിവാരം ഭഗവന്തം സഹത്ഥേന സന്തപ്പേന്തോ ഭോജേസി. ഭോജനാവസാനേ ഏകം ഉപ്പലഹത്ഥം അദാസി. തേന സോമനസ്സജാതോ പത്ഥനം അകാസി. ഭഗവാപി അനുമോദനം കത്വാ പകാമി. സോ തേന പുഞ്ഞേന ദേവമനുസ്സേസു ദ്വേ സമ്പത്തിയോ അനുഭവിത്വാ ഇമസ്മിം ബുദ്ധുപ്പാദേ സാവത്ഥിയം വിഭവസമ്പന്നേ ഏകസ്മിം കുലേ നിബ്ബത്തോ വിഞ്ഞുതം പത്തോ ഭോഗയസേഹി വഡ്ഢിതോ കാമേസു ആദീനവം ദിസ്വാ ഘരാവാസം പഹായ പബ്ബജിതോ നചിരസ്സേവ അരഹാ അഹോസി.

൬൫. സോ അപരഭാഗേ പുബ്ബേ കതകുസലം പുബ്ബേനിവാസഞാണേന സരിത്വാ സോമനസ്സപ്പത്തോ പുബ്ബചരിതാപദാനം പകാസേന്തോ നഗരേ ധഞ്ഞവതിയാതിആദിമാഹ. ധഞ്ഞാനം പുഞ്ഞവന്താനം ഖത്തിയബ്രാഹ്മണഗഹപതിമഹാസാലാനം അനേകേസം കുലാനം ആകരത്താ ധഞ്ഞവതീ, അഥ വാ മുത്താമണിആദിസത്തരതനാനം സത്തവിധധഞ്ഞാനം ഉപഭോഗപരിഭോഗാനം ആകരത്താ ധഞ്ഞവതീ, അഥ വാ ധഞ്ഞാനം ബുദ്ധപച്ചേകബുദ്ധഖീണാസവാനം വസനട്ഠാനം ആരാമവിഹാരാദീനം ആകരത്താ ധഞ്ഞവതീ, തസ്സാ ധഞ്ഞവതിയാ. നഗരന്തി പത്ഥേന്തി ഏത്ഥ ഉപഭോഗപരിഭോഗത്ഥികാ ജനാതി നഗരം, ന ഗച്ഛതീതി വാ നഗം, രാജയുവരാജമഹാമത്താദീനം വസനട്ഠാനം. നഗം രാതി ആദദാതി ഗണ്ഹാതീതി നഗരം, രാജാദീനം വസനട്ഠാനസമൂഹഭൂതം പാകാരപരിഖാദീഹി പരിക്ഖിത്തം പരിച്ഛിന്നട്ഠാനം നഗരം നാമാതി അത്ഥോ. നഗരേ യദാ അഹം വിപസ്സിസ്സ ഭഗവതോ സന്തികേ ബ്യാകരണം അലഭിം, തദാ തസ്മിം ധഞ്ഞവതിയാ നഗരേ ബ്രാഹ്മണോ അഹോസിന്തി സമ്ബന്ധോ. സേസം സബ്ബത്ഥ ഉത്താനമേവാതി.

കുസുമാസനിയത്ഥേരഅപദാനവണ്ണനാ സമത്താ.