(൭.) സത്തകനിദ്ദേസവണ്ണനാ

൯൪൯. സത്തകനിദ്ദേസേ ഥാമഗതട്ഠേന അപ്പഹീനട്ഠേന ച അനുസേന്തീതി അനുസയാ. വട്ടസ്മിം സത്തേ സംയോജേന്തി ഘടേന്തീതി സംയോജനാനി. സമുദാചാരവസേന പരിയുട്ഠഹന്തീതി പരിയുട്ഠാനാനി. കാമരാഗോവ പരിയുട്ഠാനം കാമരാഗപരിയുട്ഠാനം. സേസേസുപി ഏസേവ നയോ.

൯൫൦. അസതം ധമ്മാ, ലാമകട്ഠേന വാ അസന്താ ധമ്മാതി അസദ്ധമ്മാ. രാഗാദീഹി ദോസേഹി ദുട്ഠാനി ചരിതാനീതി ദുച്ചരിതാനി. തേന തേനാകാരേന മഞ്ഞന്തീതി മാനാ.

൯൫൧. ദിട്ഠിനിദ്ദേസേ രൂപീതി രൂപവാ. ചാതുമഹാഭൂതികോതി ചതുമഹാഭൂതമയോ. മാതാപിതൂനം ഏതന്തി മാതാപേത്തികം. കിന്തം? സുക്കസോണിതം. മാതാപേത്തികേ സമ്ഭൂതോ ജാതോതി മാതാപേത്തികസമ്ഭവോ. ഇധ രൂപകായസീസേന മനുസ്സത്തഭാവം അത്താതി വദതി. ദുതിയോ തം പടിക്ഖിപിത്വാ ദിബ്ബത്തഭാവം വദതി. ദിബ്ബോതി ദേവലോകേ സമ്ഭൂതോ. കാമാവചരോതി ഛകാമാവചരദേവപരിയാപന്നോ. കബളീകാരം ഭക്ഖയതീതി കബളീകാരഭക്ഖോ. മനോമയോതി ഝാനമനേന നിബ്ബത്തോ. സബ്ബങ്ഗപച്ചങ്ഗീതി സബ്ബങ്ഗപച്ചങ്ഗയുത്തോ. അഹീനിന്ദ്രിയോതി പരിപുണ്ണിന്ദ്രിയോ; യാനി ബ്രഹ്മലോകേ അത്ഥി തേസം വസേന, ഇതരേസഞ്ച സണ്ഠാനവസേനേതം വുത്തം. ആകാസാനഞ്ചായതനൂപഗോതി ആകാസാനഞ്ചായതനഭാവം ഉപഗതോ. ഇതരേസുപി ഏസേവ നയോ. സേസം സബ്ബത്ഥ ഉത്താനത്ഥമേവാതി.

സത്തകനിദ്ദേസവണ്ണനാ.