൩. പഞ്ഹാപുച്ഛകവണ്ണനാ

൫൦൪. പഞ്ഹാപുച്ഛകേ പാളിഅനുസാരേനേവ മഗ്ഗങ്ഗാനം കുസലാദിഭാവോ വേദിതബ്ബോ. ആരമ്മണത്തികേസു പന സബ്ബാനിപേതാനി അപ്പമാണം നിബ്ബാനം ആരബ്ഭ പവത്തിതോ അപ്പമാണാരമ്മണാനേവ, ന മഗ്ഗാരമ്മണാനി. നേവ ഹി മഗ്ഗോ ന ഫലം മഗ്ഗം ആരമ്മണം കരോതി. സഹജാതഹേതുവസേന പനേത്ഥ കുസലാനി മഗ്ഗഹേതുകാനി; വീരിയം വാ വീമംസം വാ ജേട്ഠകം കത്വാ മഗ്ഗഭാവനാകാലേ മഗ്ഗാധിപതീനി; ഛന്ദചിത്തജേട്ഠികായ മഗ്ഗഭാവനായ ന വത്തബ്ബാനി മഗ്ഗാധിപതീനീതി; ഫലകാലേപി ന വത്തബ്ബാനേവ.

അതീതാദീസു ഏകാരമ്മണഭാവേനപി ന വത്തബ്ബാനി; നിബ്ബാനസ്സ പന ബഹിദ്ധാധമ്മത്താ ബഹിദ്ധാരമ്മണാനി നാമ ഹോന്തീതി ഏവമേതസ്മിം പഞ്ഹാപുച്ഛകേപി നിബ്ബത്തിതലോകുത്തരാനേവ മഗ്ഗങ്ഗാനി കഥിതാനി. സമ്മാസമ്ബുദ്ധേന ഹി സുത്തന്തഭാജനീയസ്മിംയേവ ലോകിയലോകുത്തരാനി മഗ്ഗങ്ഗാനി കഥിതാനി; അഭിധമ്മഭാജനീയേ പന പഞ്ഹാപുച്ഛകേ ച ലോകുത്തരാനേവാതി ഏവമയം മഗ്ഗവിഭങ്ഗോപി തേപരിവട്ടം നീഹരിത്വാവ ഭാജേത്വാ ദസ്സിതോതി.

സമ്മോഹവിനോദനിയാ വിഭങ്ഗട്ഠകഥായ

മഗ്ഗങ്ഗവിഭങ്ഗവണ്ണനാ നിട്ഠിതാ.