൨൨. നത്ഥിപച്ചയനിദ്ദേസവണ്ണനാ

൨൨. നത്ഥിപച്ചയനിദ്ദേസേ സമനന്തരനിരുദ്ധാതി അഞ്ഞേന ചിത്തുപ്പാദേന അനന്തരികാ ഹുത്വാ സമനന്തരനിരുദ്ധാ. പടുപ്പന്നാനന്തി പച്ചുപ്പന്നാനം. ഇമിനാ നത്ഥിപച്ചയസ്സ ഓകാസദാനട്ഠേന നത്ഥിപച്ചയഭാവം സാധേതി. പുരിമേസു ഹി നിരോധവസേന പച്ഛിമാനം പവത്തനോകാസം അദേന്തേസു തേസം പടുപ്പന്നഭാവോ ന സിയാതി അയമേത്ഥ പാളിവണ്ണനാ. സേസം സബ്ബം അനന്തരപച്ചയേ വുത്തനയേനേവ വേദിതബ്ബം. പച്ചയലക്ഖണമേവ ഹേത്ഥ നാനം, പച്ചയാനം പന പച്ചയുപ്പന്നാനഞ്ച നാനാകരണം നത്ഥി. കേവലം പന തത്ഥ ‘‘ചക്ഖുവിഞ്ഞാണധാതു തംസമ്പയുത്തകാ ച ധമ്മാ മനോധാതുയാ’’തിആദിനാ നയേന പച്ചയാ ച പച്ചയുപ്പന്നാ ച സരൂപതോ ദസ്സിതാ. ഇധ പന ‘‘സമനന്തരനിരുദ്ധാ ചിത്തചേതസികാ ധമ്മാ പടുപ്പന്നാനം ചിത്തചേതസികാനം ധമ്മാന’’ന്തി സബ്ബേപി തേ നിരോധുപ്പാദവസേന സാമഞ്ഞതോ ദസ്സിതാതി.

നത്ഥിപച്ചയനിദ്ദേസവണ്ണനാ.