൧൦. പുരേജാതപച്ചയനിദ്ദേസവണ്ണനാ

൧൦. പുരേജാതപച്ചയനിദ്ദേസേ പുരേജാതപച്ചയേന പച്ചയോതി ഏത്ഥ പുരേജാതം നാമ യസ്സ പച്ചയോ ഹോതി, തതോ പുരിമതരം ജാതം ജാതിക്ഖണം അതിക്കമിത്വാ ഠിതിക്ഖണപ്പത്തം. ചക്ഖായതനന്തിആദി വത്ഥുപുരേജാതവസേന വുത്തം. രൂപായതനന്തിആദി ആരമ്മണപുരേജാതവസേന. കിഞ്ചികാലേ പുരേജാതപച്ചയേനാതി പവത്തിം സന്ധായ വുത്തം. കിഞ്ചികാലേ ന പുരേജാതപച്ചയേനാതി പടിസന്ധിം സന്ധായ വുത്തം. ഏവം സബ്ബഥാപി പഞ്ചദ്വാരേ വത്ഥാരമ്മണവസേന, മനോദ്വാരേ വത്ഥുവസേനേവായം പാളി ആഗതാ, പഞ്ഹാവാരേ പന ‘‘ആരമ്മണപുരേജാതം – സേക്ഖാ വാ പുഥുജ്ജനാ വാ ചക്ഖും അനിച്ചതോ ദുക്ഖതോ അനത്തതോ വിപസ്സന്തീ’’തി ആഗതത്താ മനോദ്വാരേപി ആരമ്മണപുരേജാതം ലബ്ഭതേവ. ഇധ പന സാവസേസവസേന ദേസനാ കതാതി അയം താവേത്ഥ പാളിവണ്ണനാ.

അയം പന പുരേജാതപച്ചയോ സുദ്ധരൂപമേവ ഹോതി. തഞ്ച ഖോ ഉപ്പാദക്ഖണം അതിക്കമിത്വാ ഠിതിപ്പത്തം അട്ഠാരസവിധം രൂപരൂപമേവ. തം സബ്ബമ്പി വത്ഥുപുരേജാതം ആരമ്മണപുരേജാതന്തി ദ്വിധാ ഠിതം. തത്ഥ ചക്ഖായതനം…പേ… കായായതനം വത്ഥുരൂപന്തി ഇദം വത്ഥുപുരേജാതം നാമ. സേസം ഇമായ പാളിയാ ആഗതഞ്ച അനാഗതഞ്ച വണ്ണോ സദ്ദോ ഗന്ധോ രസോ ചതസ്സോ ധാതുയോ തീണി ഇന്ദ്രിയാനി കബളീകാരോ ആഹാരോതി ദ്വാദസവിധം രൂപം ആരമ്മണപുരേജാതപച്ചയോ നാമാതി ഏവമേത്ഥ നാനപ്പകാരഭേദതോ വിഞ്ഞാതബ്ബോ വിനിച്ഛയോ.

ഏവം ഭിന്നേ പനേത്ഥ ചക്ഖായതനം ദ്വിന്നം ചക്ഖുവിഞ്ഞാണാനം പുരേജാതപച്ചയേന പച്ചയോ, തഥാ ഇതരാനി ചത്താരി സോതവിഞ്ഞാണാദീനം. വത്ഥുരൂപം പന ഠപേത്വാ ദ്വിപഞ്ചവിഞ്ഞാണാനി ചത്താരോ ച ആരുപ്പവിപാകേ സേസാനം സബ്ബേസമ്പി ചതുഭൂമകാനം കുസലാകുസലാബ്യാകതാനം ചിത്തചേതസികാനം പുരേജാതപച്ചയോ ഹോതി. രൂപാദീനി പന പഞ്ചാരമ്മണാനി ദ്വിപഞ്ചവിഞ്ഞാണാനഞ്ചേവ മനോധാതൂനഞ്ച ഏകന്തേനേവ പുരേജാതപച്ചയാ ഹോന്തി. അട്ഠാരസവിധമ്പി പനേതം രൂപരൂപം കാമാവചരകുസലസ്സ രൂപാവചരതോ അഭിഞ്ഞാകുസലസ്സ അകുസലസ്സ തദാരമ്മണഭാവിനോ കാമാവചരവിപാകസ്സ കാമാവചരകിരിയസ്സ രൂപാവചരതോ അഭിഞ്ഞാകിരിയസ്സാതി ഇമേസം ഛന്നം രാസീനം പുരേജാതപച്ചയോ ഹോതീതി ഏവമേത്ഥ പച്ചയുപ്പന്നതോപി വിഞ്ഞാതബ്ബോ വിനിച്ഛയോതി.

പുരേജാതപച്ചയനിദ്ദേസവണ്ണനാ.