൧. പണ്ണത്തിനിദ്ദേസവാരവണ്ണനാ

൨൬. ഇദാനി രൂപം രൂപക്ഖന്ധോതിആദിനാ നയേന നിദ്ദേസവാരോ ആരദ്ധോ. തത്ഥ രൂപം രൂപക്ഖന്ധോതി യംകിഞ്ചി രൂപന്തി വുച്ചതി. സബ്ബം തം രൂപം രൂപക്ഖന്ധോതി വചനസോധനത്ഥം പുച്ഛതി. പിയരൂപം സാതരൂപം, രൂപം, ന രൂപക്ഖന്ധോതി യം ‘പിയരൂപം സാതരൂപ’ന്തി ഏത്ഥ രൂപന്തി വുത്തം, തം രൂപമേവ, ന രൂപക്ഖന്ധോതി അത്ഥോ. രൂപക്ഖന്ധോ രൂപഞ്ചേവ രൂപക്ഖന്ധോ ചാതി യോ പന രൂപക്ഖന്ധോ, സോ രൂപന്തിപി രൂപക്ഖന്ധോതിപി വത്തും വട്ടതീതി അത്ഥോ. രൂപക്ഖന്ധോ രൂപന്തി ഏത്ഥ പന യസ്മാ രൂപക്ഖന്ധോ നിയമേനേവ രൂപന്തി വത്തബ്ബോ. തസ്മാ ആമന്താതി ആഹ. ഇമിനാ ഉപായേന സബ്ബവിസ്സജ്ജനേസു അത്ഥോ വേദിതബ്ബോ. യോ പന യത്ഥ വിസേസോ ഭവിസ്സതി, തഥേവ തം വണ്ണയിസ്സാമ. സഞ്ഞായമകേ താവ ദിട്ഠിസഞ്ഞാതി ‘പപഞ്ചസഞ്ഞാ’തിആദീസു ആഗതാ ദിട്ഠിസഞ്ഞാ. സങ്ഖാരയമകേ അവസേസാ സങ്ഖാരാതി ‘അനിച്ചാ വത സങ്ഖാരാ’തിആദീസു ആഗതാ സങ്ഖാരക്ഖന്ധതോ അവസേസാ സങ്ഖതധമ്മാ. പടിലോമവാരേപി ഏസേവ നയോതി.

പദസോധനവാരോ നിട്ഠിതോ.

൨൮. പദസോധനമൂലചക്കവാരേ ഖന്ധാ വേദനാക്ഖന്ധോതി യേകേചി ഖന്ധാ, സബ്ബേ തേ വേദനാക്ഖന്ധോതി പുച്ഛതി. സേസപുച്ഛാസുപി ഏസേവ നയോ. പടിലോമേ ന ഖന്ധാ ന വേദനാക്ഖന്ധോതി ഏത്ഥ യേ പഞ്ഞത്തിനിബ്ബാനസങ്ഖാതാ ധമ്മാ ഖന്ധാ ന ഹോന്തി, തേ യസ്മാ വേദനാക്ഖന്ധോപി ന ഹോന്തി, തസ്മാ ആമന്താതി ആഹ. സേസവിസ്സജ്ജനേസുപി ഏസേവ നയോതി.

പദസോധനമൂലചക്കവാരോ നിട്ഠിതോ.

൩൮. സുദ്ധഖന്ധവാരേ രൂപം ഖന്ധോതി യംകിഞ്ചി രൂപന്തി വുത്തം, സബ്ബം തം ഖന്ധോതി പുച്ഛതി. തത്ഥ യസ്മാ പിയരൂപസാതരൂപസങ്ഖാതം വാ രൂപം ഹോതു, ഭൂതുപാദാരൂപം വാ, സബ്ബം പഞ്ചസു ഖന്ധേസു സങ്ഗഹം ഗച്ഛതേവ. തസ്മാ ആമന്താതി പടിജാനാതി. ദുതിയപദേ ‘ഖന്ധാ രൂപ’ന്തി പുച്ഛിതബ്ബേ യസ്മാ രൂപന്തിവചനേന രൂപക്ഖന്ധോവ അധിപ്പേതോ, തസ്മാ വചനം അനാദിയിത്വാ അത്ഥവസേന പുച്ഛന്തോ ഖന്ധാ രൂപക്ഖന്ധോതി ആഹ. ഇമിനാ നയേന സബ്ബപദേസു അത്ഥോ വേദിതബ്ബോ. പരതോ ആയതനയമകാദീനം നിദ്ദേസവാരേപി ഏസേവ നയോ. സഞ്ഞാ ഖന്ധോതി ഏത്ഥാപി ദിട്ഠിസഞ്ഞാ വാ ഹോതു, സഞ്ഞാ ഏവ വാ, സബ്ബായപി ഖന്ധഭാവതോ ആമന്താതി വുത്തം. സങ്ഖാരാ ഖന്ധോതി പദേപി ഏസേവ നയോ. ഖന്ധവിനിമുത്തകോ ഹി സങ്ഖാരോ നാമ നത്ഥി.

൩൯. പടിലോമേ ന രൂപം ന ഖന്ധോതി യം ധമ്മജാതം രൂപം ന ഹോതി, തം ഖന്ധോപി ന ഹോതീതി പുച്ഛതി. വിസ്സജ്ജനേ പനസ്സ രൂപം ഠപേത്വാ അവസേസാ ഖന്ധാ ന രൂപം, ഖന്ധാതി രൂപതോ അഞ്ഞേ വേദനാദയോ ഖന്ധാ രൂപമേവ ന ഹോന്തി, ഖന്ധാ പന ഹോന്തീതി അത്ഥോ. രൂപഞ്ച ഖന്ധേ ച ഠപേത്വാ അവസേസാതി പഞ്ചക്ഖന്ധവിനിമുത്തം നിബ്ബാനഞ്ചേവ പഞ്ഞത്തി ച. ഇതോ പരേസുപി ‘അവസേസാ’തി പദേസു ഏസേവ നയോതി.

സുദ്ധഖന്ധവാരോ നിട്ഠിതോ.

൪൦-൪൪. സുദ്ധഖന്ധമൂലചക്കവാരേ രൂപം ഖന്ധോതിആദീനം ഹേട്ഠാ വുത്തനയേനേവ അത്ഥോ വേദിതബ്ബോതി.

സുദ്ധഖന്ധമൂലചക്കവാരോ നിട്ഠിതോ.

പണ്ണത്തിനിദ്ദേസവാരവണ്ണനാ.