൧൦. പഞ്ഞത്താനുയോഗവണ്ണനാ

൬൧-൬൬. ഇദാനി പഞ്ഞത്താനുയോഗോ നാമ ഹോതി. രൂപധാതുയാ ഹി പുഗ്ഗലവാദീ രൂപിം പുഗ്ഗലം പഞ്ഞപേതി, തഥാ അരൂപധാതുയാ അരൂപിം. തസ്സ തം ലദ്ധിം ഭിന്ദിതും സബ്ബാപി പുച്ഛാ സകവാദിസ്സ, പടിഞ്ഞാ ച പടിക്ഖേപോ ച ഇതരസ്സ. സോ ഹി രൂപീതി വുത്തേ രൂപകായസബ്ഭാവതോ ചേവ തഥാരൂപായ ച പഞ്ഞത്തിയാ അത്ഥിതായ പടിജാനാതി. കാമീതി വുത്തേ വീതരാഗസബ്ഭാവതോ ചേവ തഥാരൂപായ ച പഞ്ഞത്തിയാ നത്ഥിതായ പടിക്ഖിപതി. അരൂപീതി വുത്തേപി അരൂപക്ഖന്ധസബ്ഭാവതോ ചേവ തഥാരൂപായ ച പഞ്ഞത്തിയാ അത്ഥിതായ പടിജാനാതി. ദ്വീസുപി നയേസു സത്തോതി പുഗ്ഗലസ്സ വേവചനവസേന വുത്തം.

൬൭. ഇദാനി യസ്മാ സോ ‘‘കായേ കായാനുപസ്സീ’’തി ആഗതട്ഠാനേ അഞ്ഞോ കായോ അഞ്ഞോ പുഗ്ഗലോതി ഇച്ഛതി, തസ്മാ തം ലദ്ധിം ഭിന്ദിതും കായോതി വാ സരീരന്തി വാതിആദി സകവാദീപുച്ഛാ ഹോതി. തത്ഥ കായം അപ്പിയം കരിത്വാതി കായം അപ്പേതബ്ബം അല്ലീയാപേതബ്ബം ഏകീഭാവം ഉപനേതബ്ബം അവിഭജിതബ്ബം കത്വാ പുച്ഛാമീതി അത്ഥോ. ഏസേസേതി ഏസോ സോയേവ. ഏസേ ഏസേതിപി പാഠോ. ഏസോ ഏസോയേവാതി അത്ഥോ. ഏകട്ഠേതി ഏകട്ഠോ. സമേ സമഭാഗേ തജ്ജാതേതി സമോ സമഭാഗോ തജ്ജാതികോ. വചനമത്തേയേവേത്ഥ ഭേദോ. അത്ഥതോ പന കായോവ ഏസോതി പുച്ഛതി. പരവാദീ നാനത്തം അപസ്സന്തോ ആമന്താതി പടിജാനാതി. പുഗ്ഗലോതി വാ ജീവോതി വാതി പുച്ഛായപി ഏസേവ നയോ. അഞ്ഞോ കായോതി പുട്ഠോ പന കായാനുപസ്സനായ ഏവംലദ്ധികത്താ പടിജാനാതി. അഞ്ഞം ജീവന്തി പുട്ഠോ പന ആഹച്ച ഭാസിതം സുത്തം പടിക്ഖിപിതും അസക്കോന്തോ അവജാനാതി. തതോ പരം ‘‘ആജാനാഹി നിഗ്ഗഹ’’ന്തിആദി ഉത്താനത്ഥമേവ.

൬൮. പരവാദീപക്ഖേ പന അഞ്ഞോ കായോ അഞ്ഞോ പുഗ്ഗലോതി പുട്ഠോ സകവാദീ ഠപനീയപഞ്ഹത്താ പടിക്ഖിപതി, പരവാദീ ഛലവസേന പടികമ്മം കരോതി. തമ്പി ഉത്താനത്ഥമേവാതി.

പഞ്ഞത്താനുയോഗവണ്ണനാ നിട്ഠിതാ.