൬. കുസലകഥാവണ്ണനാ

൮൪൪-൮൪൬. ഇദാനി കുസലകഥാ നാമ ഹോതി. തത്ഥ അനവജ്ജമ്പി കുസലം ഇട്ഠപാകമ്പി. അനവജ്ജം നാമ കിലേസവിപ്പയുത്തം. അയം നയോ ഠപേത്വാ അകുസലം സബ്ബധമ്മേ ഭജതി. ഇട്ഠവിപാകം നാമ ആയതിം ഉപപത്തിപവത്തേസു ഇട്ഠഫലനിപ്ഫാദകം പുഞ്ഞം. അയം നയോ കുസലത്തികേ ആദിപദമേവ ഭജതി. യേസം പന ഇമം വിഭാഗം അഗ്ഗഹേത്വാ അനവജ്ജഭാവമത്തേനേവ നിബ്ബാനം കുസലന്തി ലദ്ധി, സേയ്യഥാപി അന്ധകാനം, തേസം ഇട്ഠവിപാകട്ഠേന നിബ്ബാനസ്സ കുസലതാഭാവം ദീപേതും പുച്ഛാ സകവാദിസ്സ, അത്തനോ ലദ്ധിവസേന പടിഞ്ഞാ ഇതരസ്സ. സേസമിധാപി ഹേട്ഠാ വുത്തനയത്താ ഉത്താനത്ഥമേവാതി.

കുസലകഥാവണ്ണനാ.