൧. സംവരോ കമ്മന്തികഥാവണ്ണനാ

൬൩൦-൬൩൨. ഇദാനി സംവരോ കമ്മന്തികഥാ നാമ ഹോതി. തത്ഥ ‘‘ചക്ഖുനാ രൂപം ദിസ്വാ നിമിത്തഗ്ഗാഹീ ഹോതി, ന നിമിത്തഗ്ഗാഹീ ഹോതീ’’തി സുത്തം നിസ്സായ ‘‘സംവരോപി അസംവരോപി കമ്മ’’ന്തി യേസം ലദ്ധി, സേയ്യഥാപി മഹാസംഘികാനം; തേ സന്ധായ പുച്ഛാ സകവാദിസ്സ, പടിഞ്ഞാ ഇതരസ്സ.

അഥ നം യാ സകസമയേ ചേതനാ ‘‘കമ്മ’’ന്തി വുത്താ യഥാ സാ കായവചീമനോദ്വാരേസു പവത്തമാനാ കായകമ്മാദിനാമം ലഭതി, തഥാ ‘‘യദി തേ സംവരോ കമ്മം, സോപി ചക്ഖുന്ദ്രിയാദീസു പവത്തമാനോ ചക്ഖുകമ്മാദിനാമം ലഭേയ്യാ’’തി ചോദേതും ചക്ഖുന്ദ്രിയസംവരോ ചക്ഖുകമ്മന്തിആദിമാഹ. ഇതരോ താദിസം സുത്തപദം അപസ്സന്തോ ചതൂസു ദ്വാരേസു പടിക്ഖിപിത്വാ പഞ്ചമേ കായദ്വാരേ പസാദകായം സന്ധായ പടിക്ഖിപതി, വിഞ്ഞത്തികായം സന്ധായ പടിജാനാതി. സോ ഹി പസാദകായമ്പി വിഞ്ഞത്തികായമ്പി കായിന്ദ്രിയന്ത്വേവ ഇച്ഛതി. മനോദ്വാരേപി വിപാകദ്വാരം സന്ധായ പടിക്ഖിപതി, കമ്മദ്വാരം സന്ധായ പടിജാനാതി. അസംവരേപി ഏസേവ നയോ. ‘‘ചക്ഖുനാ രൂപം ദിസ്വാ’’തി സുത്തം തേസു ദ്വാരേസു സംവരാസംവരമേവ ദീപേതി, ന തസ്സ കമ്മഭാവം, തസ്മാ അസാധകന്തി.

സംവരോ കമ്മന്തികഥാവണ്ണനാ.