൪. ഞാണകഥാവണ്ണനാ

൬൧൪-൬൧൫. ഇദാനി ഞാണകഥാ നാമ ഹോതി. തത്ഥ മഗ്ഗഞാണേന അഞ്ഞാണേ വിഗതേപി പുന ചക്ഖുവിഞ്ഞാണാദിവസേന ഞാണവിപ്പയുത്തചിത്തേ വത്തമാനേ യസ്മാ തം മഗ്ഗചിത്തം ന പവത്തതി, തസ്മാ ‘‘ന വത്തബ്ബം ഞാണീ’’തി യേസം ലദ്ധി, സേയ്യഥാപി മഹാസംഘികാനം; തേ സന്ധായ പുച്ഛാ സകവാദിസ്സ, പടിഞ്ഞാ ഇതരസ്സ. അഥ നം ‘‘യദി അഞ്ഞാണേ വിഗതേ ‘ഞാണീ’തി പഞ്ഞത്തി ന സിയാ, രാഗാദീസു വിഗതേസു വീതരാഗാദിപഞ്ഞത്തിപി ന സിയാതി പുഗ്ഗലപഞ്ഞത്തിയം അകോവിദോസീ’’തി ചോദേതും രാഗേ വിഗതേതിആദിമാഹ. ഇതരോ തേസു വിഗതേസു സരാഗാദിഭാവേ യുത്തിം അപസ്സന്തോ പടിക്ഖിപതി. പരിയോസാനേ യസ്മാ ഞാണപടിലാഭേന സോ ഞാണീതി വത്തബ്ബതം അരഹതി, തസ്മാ ന ഹേവന്തി പടിക്ഖേപോ സകവാദിസ്സാതി.

ഞാണകഥാവണ്ണനാ.