൫. ഞാണം ചിത്തവിപ്പയുത്തന്തികഥാവണ്ണനാ

൬൧൬-൬൧൭. ഇദാനി ഞാണം ചിത്തവിപ്പയുത്തന്തികഥാ നാമ ഹോതി. തത്ഥ യസ്മാ അരഹാ ചക്ഖുവിഞ്ഞാണാദിസമങ്ഗീ പടിലദ്ധം മഗ്ഗഞാണം സന്ധായ ‘‘ഞാണീ’’തി വുച്ചതി, ന ചസ്സ തം തേന ചിത്തേന സമ്പയുത്തം, തസ്മാ ‘‘ഞാണം ചിത്തവിപ്പയുത്ത’’ന്തി യേസം ലദ്ധി, സേയ്യഥാപി പുബ്ബസേലിയാനം; തേ സന്ധായ പുച്ഛാ സകവാദിസ്സ, പടിഞ്ഞാ ഇതരസ്സ. അഥ നം ‘‘യദി തേ ഞാണം ചിത്തവിപ്പയുത്തം ചിത്തവിപ്പയുത്തേസു രൂപാദീസു അഞ്ഞതരം സിയാ’’തി ചോദേതും രൂപന്തിആദിമാഹ. ഇതരോ പടിക്ഖിപതി. സേസം ഹേട്ഠാ വുത്തനയമേവ. പരിയോസാനേ പന പഞ്ഞവാതി പുട്ഠോ പടിലാഭവസേന തം പവത്തിം ഇച്ഛതി, തസ്മാ പടിജാനാതീതി.

ഞാണം ചിത്തവിപ്പയുത്തന്തികഥാവണ്ണനാ.