൧൦. അനിച്ചതാകഥാവണ്ണനാ

൬൨൮. ഇദാനി അനിച്ചതാകഥാ നാമ ഹോതി. തത്ഥ ‘‘അനിച്ചാനം രൂപാദീനം അനിച്ചതാപി രൂപാദയോ വിയ പരിനിപ്ഫന്നാ’’തി യേസം ലദ്ധി, സേയ്യഥാപി അന്ധകാനം; തേ സന്ധായ പുച്ഛാ സകവാദിസ്സ, പടിഞ്ഞാ ഇതരസ്സ. അഥ നം ‘‘യദി തേ രൂപാദയോ വിയ അനിച്ചതാ പരിനിപ്ഫന്നാ, തസ്സാപി അഞ്ഞായ പരിനിപ്ഫന്നായ അനിച്ചതായ ഭവിതബ്ബ’’ന്തി ചോദേതും തായ അനിച്ചതായാതിആദിമാഹ. ഇതരോ ദ്വിന്നം അനിച്ചതായ ഏകതോ അഭാവേന പടിക്ഖിപിത്വാ പുന യസ്മാ സാ അനിച്ചതാ നിച്ചാ ന ഹോതി, തേനേവ അനിച്ചേന സദ്ധിം അന്തരധായതി, തസ്മാ പടിജാനാതി. അഥസ്സ സകവാദീ ലേസോകാസം അദത്വാ യാ തേന ദുതിയാ അനിച്ചതാ പടിഞ്ഞാതാ, തായപി തതോ പരായപീതി പരമ്പരവസേന അനുപച്ഛേദദോസം ആരോപേന്തോ തായ തായേവാതിആദിമാഹ. ജരാ പരിനിപ്ഫന്നാതിആദി യസ്മാ ഉപ്പന്നസ്സ ജരാമരണതോ അഞ്ഞാ അനിച്ചതാ നാമ നത്ഥി, തസ്മാ അനിച്ചതാവിഭാഗാനുയുഞ്ജനവസേന വുത്തം. തത്രാപി പരവാദിനോ പുരിമനയേനേവ പടിഞ്ഞാ ച പടിക്ഖേപോ ച വേദിതബ്ബോ.

൬൨൯. രൂപം പരിനിപ്ഫന്നന്തിആദി യേസം സാ അനിച്ചതാ, തേഹി സദ്ധിം സംസന്ദനത്ഥം വുത്തം. തത്ഥ ‘‘യഥാ പരിനിപ്ഫന്നാനം രൂപാദീനം അനിച്ചതാജരാമരണാനി അത്ഥി, ഏവം പരിനിപ്ഫന്നാനം അനിച്ചതാദീനം താനി നത്ഥീ’’തി മഞ്ഞമാനോ ഏകന്തേന പടിക്ഖിപതിയേവാതി.

അനിച്ചതാകഥാവണ്ണനാ.

ഏകാദസമോ വഗ്ഗോ.