൮. കുക്കുളകഥാവണ്ണനാ

൩൩൮. ഇദാനി കുക്കുളകഥാ നാമ ഹോതി. തത്ഥ യേസം ‘‘സബ്ബം, ഭിക്ഖവേ, ആദിത്തം (സം. നി. ൪.൨൮; മഹാവ. ൫൪) സബ്ബേ സങ്ഖാരാ ദുക്ഖാ’’തിആദീനി (ധ. പ. ൨൭൮) സുത്താനി അയോനിസോ ഗഹേത്വാ ‘‘നിപ്പരിയായേനേവ സബ്ബേ സങ്ഖാരാ കുക്കുളാ വീതച്ചിതങ്ഗാരസമ്മിസ്സാ ഛാരികനിരയസദിസാ’’തി ലദ്ധി, സേയ്യഥാപി ഏതരഹി ഗോകുലികാനം; തേസം നാനപ്പകാരസുഖസന്ദസ്സനേന തം ലദ്ധിം വിവേചേതും പുച്ഛാ സകവാദിസ്സ, പടിഞ്ഞാ പരവാദിസ്സ. തത്ഥ അനോധിം കത്വാതി ഓധിം മരിയാദം കോട്ഠാസം അകരിത്വാ, അവിസേസേന സബ്ബേയേവാതി അത്ഥോ. സേസം സബ്ബം പാളിനയേനേവ വേദിതബ്ബം സദ്ധിം സുത്തസാധനായാതി.

കുക്കുളകഥാവണ്ണനാ.