൯. ആനന്ദസുത്തവണ്ണനാ

൫൧. നവമേ കിത്താവതാതി കിത്തകേന. അസ്സുതഞ്ചേവാതി അഞ്ഞസ്മിം കാലേ അസ്സുതപുബ്ബം. ന സമ്മോസം ഗച്ഛന്തീതി വിനാസം ന ഗച്ഛന്തി. ചേതസോ സമ്ഫുട്ഠപുബ്ബാതി ചിത്തേന ഫുസിതപുബ്ബാ. സമുദാചരന്തീതി മനോദ്വാരേ ചരന്തി. അവിഞ്ഞാതഞ്ച വിജാനാതീതി അഞ്ഞസ്മിം കാലേ അവിഞ്ഞാതകാരണം ജാനാതി. പരിയാപുണാതീതി വളഞ്ജേതി കഥേതി. ദേസേതീതി പകാസേതി. പരം വാചേതീതി പരം ഉഗ്ഗണ്ഹാപേതി.

ആഗതാഗമാതി ദീഘാദീസു യോ കോചി ആഗമോ ആഗതോ ഏതേസന്തി ആഗതാഗമാ. ധമ്മധരാതി സുത്തന്തപിടകധരാ. വിനയധരാതി വിനയപിടകധരാ. മാതികാധരാതി ദ്വേപാതിമോക്ഖധരാ. പരിപുച്ഛതീതി അനുസന്ധിപുബ്ബാപരം പുച്ഛതി. പരിപഞ്ഹതീതി ഇദഞ്ചിദഞ്ച പുച്ഛിസ്സാമീതി പരിതുലതി പരിച്ഛിന്ദതി. ഇദം, ഭന്തേ, കഥന്തി, ഭന്തേ, ഇദം അനുസന്ധിപുബ്ബാപരം കഥം ഹോതീതി പുച്ഛതി. ഇമസ്സ ക്വത്ഥോതി ഇമസ്സ ഭാസിതസ്സ കോ അത്ഥോതി പുച്ഛതി. അവിവടന്തി അവിവരിതം. വിവരന്തീതി പാകടം കരോന്തി. കങ്ഖാഠാനിയേസൂതി കങ്ഖായ കാരണഭൂതേസു. തത്ഥ യസ്മിം ധമ്മേ കങ്ഖാ ഉപ്പജ്ജതി, സ്വേവ കങ്ഖാഠാനിയോ നാമാതി വേദിതബ്ബോ.