൧൦. ദുതിയമരണസ്സതിസുത്തവണ്ണനാ

൨൦. ദസമേ പതിഗതായാതി പടിപന്നായ. ഇതി പടിസഞ്ചിക്ഖതീതി ഏവം പച്ചവേക്ഖതി. സോ മമസ്സ അന്തരായോതി ഏത്ഥ തിവിധോ അന്തരായോ ജീവിതന്തരായോ, സമണധമ്മന്തരായോ, പുഥുജ്ജനകാലകിരിയം കരോന്തസ്സ സഗ്ഗന്തരായോ ചേവ മഗ്ഗന്തരായോ ചാതി. തം സബ്ബമ്പി സന്ധായേവമാഹ. ബ്യാപജ്ജേയ്യാതി അജിണ്ണകാദിവസേന വിപജ്ജേയ്യ. അധിമത്തോതി ബലവാ. ഛന്ദോതി കത്തുകമ്യതാഛന്ദോ. വായാമോതി പയോഗവീരിയം. ഉസ്സാഹോതി ഉസ്സാപനവീരിയം. ഉസ്സോള്ഹീതി സമ്പാദനവീരിയം. അപ്പടിവാനീതി അനുക്കണ്ഠനാ അപ്പടിസങ്ഘരണാ. സേസം സബ്ബത്ഥ ഉത്താനത്ഥമേവാതി.

സാരണീയവഗ്ഗോ ദുതിയോ.