൭. അസപ്പുരിസദാനസുത്തവണ്ണനാ

൧൪൭. സത്തമേ അസക്കച്ചം ദേതീതി ന സക്കരിത്വാ സുചിം കത്വാ ദേതി. അചിത്തീകത്വാ ദേതീതി അചിത്തീകാരേന അഗാരവവസേന ദേതി. അപവിദ്ധം ദേതീതി ന നിരന്തരം ദേതി, അഥ വാ ഛഡ്ഡേതുകാമോ വിയ ദേതി. അനാഗമനദിട്ഠികോ ദേതീതി കതസ്സ നാമ ഫലം ആഗമിസ്സതീതി ന ഏവം ആഗമനദിട്ഠിം ന ഉപ്പാദേത്വാ ദേതി.

സുക്കപക്ഖേ ചിത്തീകത്വാ ദേതീതി ദേയ്യധമ്മേ ച ദക്ഖിണേയ്യേസു ച ചിത്തീകാരം ഉപട്ഠപേത്വാ ദേതി. തത്ഥ ദേയ്യധമ്മം പണീതം ഓജവന്തം കത്വാ ദേന്തോ ദേയ്യധമ്മേ ചിത്തീകാരം ഉപട്ഠപേതി നാമ. പുഗ്ഗലം വിചിനിത്വാ ദേന്തോ ദക്ഖിണേയ്യേസു ചിത്തീകാരം ഉപട്ഠപേതി നാമ. സഹത്ഥാ ദേതീതി ആണത്തിയാ പരഹത്ഥേന അദത്വാ ‘‘അനമതഗ്ഗേ സംസാരേ വിചരന്തേന മേ ഹത്ഥപാദാനം അലദ്ധകാലസ്സ പമാണം നാമ നത്ഥി, വട്ടമോക്ഖം ഭവനിസ്സരണം കരിസ്സാമീ’’തി സഹത്ഥേനേവ ദേതി. ആഗമനദിട്ഠികോതി ‘‘അനാഗതഭവസ്സ പച്ചയോ ഭവിസ്സതീ’’തി കമ്മഞ്ച വിപാകഞ്ച സദ്ദഹിത്വാ ദേതീതി.