൪. ദുതിയനാനാകരണസുത്തവണ്ണനാ

൧൨൪. ചതുത്ഥേ രൂപമേവ രൂപഗതം. സേസപദേസുപി ഏസേവ നയോ. അനിച്ചതോതിആദീസു ഹുത്വാ അഭാവട്ഠേന അനിച്ചതോ, ആബാധട്ഠേന രോഗതോ, അന്തോ പദുസ്സനട്ഠേന ഗണ്ഡതോ, അനുപവിട്ഠട്ഠേന സല്ലതോ, സദുക്ഖട്ഠേന അഘതോ, സമ്പീളനട്ഠേന ആബാധതോ, അവിധേയ്യട്ഠേന പരതോ, പലുജ്ജനട്ഠേന പലോകതോ, നിസ്സത്തട്ഠേന സുഞ്ഞതോ, അവസവത്തനട്ഠേന അനത്തതോ. ഏത്ഥ ച ‘‘അനിച്ചതോ പലോകതോ’’തി ദ്വീഹി പദേഹി അനിച്ചലക്ഖണം കഥിതം, ‘‘സുഞ്ഞതോ അനത്തതോ’’തി ദ്വീഹി അനത്തലക്ഖണം, സേസേഹി ദുക്ഖലക്ഖണം കഥിതന്തി വേദിതബ്ബം. സമനുപസ്സതീതി ഞാണേന പസ്സതി. ഏവം പഞ്ചക്ഖന്ധേ തിലക്ഖണം ആരോപേത്വാ പസ്സന്തോ തയോ മഗ്ഗേ തീണി ഫലാനി സച്ഛികരോതി. സുദ്ധാവാസാനം ദേവാനം സഹബ്യതം ഉപപജ്ജതീതി തത്ഥ ഠിതോ ചതുത്ഥജ്ഝാനം ഭാവേത്വാ ഉപപജ്ജതി.