൧൦. ചക്കവത്തിഅച്ഛരിയസുത്തവണ്ണനാ

൧൩൦. ദസമേ ഖത്തിയപരിസാതി അഭിസിത്താ അനഭിസിത്താ ച ഖത്തിയാ. തേ ഹി കിര ‘‘രാജാ ചക്കവത്തീ നാമ അഭിരൂപോ പാസാദികോ ഹോതി, ആകാസേന വിചരന്തോ രജ്ജം അനുസാസതി, ധമ്മികോ ധമ്മരാജാ’’തി തസ്സ ഗുണകഥം സുത്വാ സവനേന ദസ്സനമ്ഹി സമേന്തേ അത്തമനാ ഹോന്തി. ഭാസതീതി ‘‘കഥം, താതാ, രാജധമ്മം പൂരേഥ, പവേണിം രക്ഖഥാ’’തി പടിസന്ഥാരം കരോതി. ബ്രാഹ്മണേസു പന ‘‘കഥഞ്ച, ആചരിയാ, മന്തേ വാചേഥ, അന്തേവാസികാ മന്തേ ഗണ്ഹന്തി, ദക്ഖിണം വാ വത്ഥാനി വാ സീലം വാ ലഭഥാ’’തി ഏവം പടിസന്ഥാരം കരോതി. ഗഹപതീസു ‘‘കഥം, താതാ, ന വോ രാജകുലതോ ദണ്ഡേന വാ ബന്ധനേന വാ പീളാ അത്ഥി, സമ്മാ ദേവോ ധാരം അനുപ്പവേച്ഛതി, സസ്സാനി സമ്പജ്ജന്തീ’’തി ഏവം പടിസന്ഥാരം കരോതി. സമണേസു ‘‘കഥം, ഭന്തേ, കച്ചി പബ്ബജിതപരിക്ഖാരാ സുലഭാ, സമണധമ്മേ നപ്പമജ്ജഥാ’’തി ഏവം പടിസന്ഥാരം കരോതീതി.

ഭയവഗ്ഗോ തതിയോ.