൮. പതിലീനസുത്തവണ്ണനാ

൩൮. അട്ഠമേ പനുണ്ണപച്ചേകസച്ചോതി ‘‘ഇദമേവ ദസ്സനം സച്ചം, ഇദമേവ സച്ച’’ന്തി ഏവം പാടിഏക്കം ഗഹിതത്താ പച്ചേകസങ്ഖാതാനി ദിട്ഠിസച്ചാനി പനുണ്ണാനി നീഹടാനി പഹീനാനി അസ്സാതി പനുണ്ണപച്ചേകസച്ചോ. സമവയസട്ഠേസനോതി ഏത്ഥ അവയാതി അനൂനാ, സട്ഠാതി വിസ്സട്ഠാ, സമ്മാ അവയാ സട്ഠാ ഏസനാ അസ്സാതി സമവയസട്ഠേസനോ, സമ്മാ വിസ്സട്ഠസബ്ബഏസനോതി അത്ഥോ. പതിലീനോതി നിലീനോ ഏകീഭാവം ഉപഗതോ. പുഥുസമണബ്രാഹ്മണാനന്തി ബഹൂനം സമണബ്രാഹ്മണാനം. ഏത്ഥ ച സമണാതി പബ്ബജ്ജൂപഗതാ, ബ്രാഹ്മണാതി ഭോവാദിനോ. പുഥുപച്ചേകസച്ചാനീതി ബഹൂനി പാടേക്കസച്ചാനി. നുണ്ണാനീതി നീഹടാനി. പനുണ്ണാനീതി സുട്ഠു നീഹടാനി. ചത്താനീതി വിസ്സട്ഠാനി. വന്താനീതി വമിതാനി. മുത്താനീതി ഛിന്നബന്ധനാനി കതാനി. പഹീനാനീതി പജഹിതാനി. പടിനിസ്സട്ഠാനീതി യഥാ ന പുന ചിത്തം ആരോഹന്തി, ഏവം പടിനിസ്സജ്ജിതാനി. സബ്ബാനേവേതാനി ഗഹിതഗഹണസ്സ വിസ്സട്ഠഭാവവേവചനാനി.

കാമേസനാ പഹീനാ ഹോതീതി അനാഗാമിമഗ്ഗേന പഹീനാ. ഭവേസനാ പന അരഹത്തമഗ്ഗേന പഹീയതി. ‘‘ബ്രഹ്മചരിയം ഏസിസ്സാമി ഗവേസിസ്സാമീ’’തി ഏവം പവത്തജ്ഝാസയസങ്ഖാതാ ബ്രഹ്മചരിയേസനാപി അരഹത്തമഗ്ഗേനേവ പടിപ്പസ്സദ്ധിം വൂപസമം ഗച്ഛതി. ദിട്ഠിബ്രഹ്മചരിയേസനാ പന സോതാപത്തിമഗ്ഗേനേവ പടിപ്പസമ്ഭതീതി വേദിതബ്ബാ. ഏവം ഖോ, ഭിക്ഖവേതി ഏവം ചതുത്ഥജ്ഝാനേന പസ്സദ്ധകായസങ്ഖാരോ വൂപസന്തഅസ്സാസപസ്സാസോ നാമ ഹോതി. അസ്മിമാനോതി അസ്മീതി ഉപ്പജ്ജനകോ നവവിധമാനോ.

ഗാഥാസു കാമേസനാ ഭവേസനാതി ഏതാ ദ്വേ ഏസനാ, ബ്രഹ്മചരിയേസനാ സഹാതി താഹിയേവ സഹ ബ്രഹ്മചരിയേസനാതി തിസ്സോപി ഏതാ. ഇധ ഠത്വാ ഏസനാ പടിനിസ്സട്ഠാതി ഇമിനാ പദേന സദ്ധിം യോജനാ കാതബ്ബാ. ഇതി സച്ചപരാമാസോ, ദിട്ഠിട്ഠാനാ സമുസ്സയാതി ‘‘ഇതി സച്ചം ഇതി സച്ച’’ന്തി ഗഹണപരാമാസോ ച ദിട്ഠിസങ്ഖാതായേവ ദിട്ഠിട്ഠാനാ ച യേ സമുസ്സിതത്താ ഉഗ്ഗന്ത്വാ ഠിതത്താ സമുസ്സയാതി വുച്ചന്തി, തേ സബ്ബേപി. ഇധ ഠത്വാ ദിട്ഠിട്ഠാനാ സമൂഹതാതി ഇമിനാ പദേന സദ്ധിം യോജനാ കാതബ്ബാ. കസ്സ പന ഏതാ ഏസനാ പടിനിസ്സട്ഠാ, ഏതേ ച ദിട്ഠിട്ഠാനാ സമൂഹതാതി? സബ്ബരാഗവിരത്തസ്സ തണ്ഹാക്ഖയവിമുത്തിനോ. യോ ഹി സബ്ബരാഗേഹിപി വിരത്തോ, തണ്ഹാക്ഖയേ ച നിബ്ബാനേ പവത്തായ അരഹത്തഫലവിമുത്തിയാ സമന്നാഗതോ, ഏതസ്സ ഏസനാ പടിനിസ്സട്ഠാ, ദിട്ഠിട്ഠാനാ ച സമൂഹതാ. സ വേ സന്തോതി സോ ഏവരൂപോ കിലേസസന്തതായ സന്തോ. പസ്സദ്ധോതി ദ്വീഹി കായചിത്തപസ്സദ്ധീഹി പസ്സദ്ധോ. അപരാജിതോതി സബ്ബകിലേസേ ജിനിത്വാ ഠിതത്താ കേനചി അപരാജിതോ. മാനാഭിസമയാതി മാനസ്സ പഹാനാഭിസമയേന. ബുദ്ധോതി ചത്താരി സച്ചാനി ബുജ്ഝിത്വാ ഠിതോ. ഇതി ഇമസ്മിം സുത്തേപി ഗാഥാസുപി ഖീണാസവോവ കഥിതോതി.