൯. ഉജ്ജയസുത്തവണ്ണനാ

൩൯. നവമേ സങ്ഘാതം ആപജ്ജന്തീതി വധം മരണം ആപജ്ജന്തി. നിച്ചദാനന്തി സലാകഭത്തം. അനുകുലയഞ്ഞന്തി അമ്ഹാകം പിതൂഹി പിതാമഹേഹി ദിന്നത്താ ഏവം കുലാനുകുലവസേന യജിതബ്ബം, ദാതബ്ബന്തി അത്ഥോ. അസ്സമേധന്തിആദീസു അസ്സമേത്ഥ മേധന്തീതി അസ്സമേധോ, ദ്വീഹി പരിയഞ്ഞേഹി യജിതബ്ബസ്സ ഏകവീസതിയൂപസ്സ ഠപേത്വാ ഭൂമിഞ്ച പുരിസേ ച അവസേസസബ്ബവിഭവദക്ഖിണസ്സ യഞ്ഞസ്സേതം അധിവചനം. പുരിസമേത്ഥ മേധന്തീതി പുരിസമേധോ, ചതൂഹി പരിയഞ്ഞേഹി യജിതബ്ബസ്സ സദ്ധിം ഭൂമിയാ അസ്സമേധേ വുത്തവിഭവദക്ഖിണസ്സ യഞ്ഞസ്സേതം അധിവചനം. സമ്മമേത്ഥ പാസന്തീതി സമ്മാപാസോ, ദിവസേ ദിവസേ സമ്മം ഖിപിത്വാ തസ്സ പതിതോകാസേ വേദിം കത്വാ സംഹാരിമേഹി യൂപാദീഹി സരസ്സതിനദിയാ നിമുഗ്ഗോകാസതോ പഭുതി പടിലോമം ഗച്ഛന്തേന യജിതബ്ബസ്സ സബ്ബയാഗസ്സേതം അധിവചനം. വാജമേത്ഥ പിവന്തീതി വാജപേയ്യം, ഏകേന പരിയഞ്ഞേന സത്തരസഹി പസൂഹി യജിതബ്ബസ്സ ബേലുവയൂപസ്സ സത്തരസകദക്ഖിണസ്സ യഞ്ഞസ്സേതം അധിവചനം. നത്ഥി ഏത്ഥ അഗ്ഗളാതി നിരഗ്ഗളോ. നവഹി പരിയഞ്ഞേഹി യജിതബ്ബസ്സ സദ്ധിം ഭൂമിയാ പുരിസേഹി ച അസ്സമേധേ വുത്തവിഭവദക്ഖിണസ്സ സബ്ബമേധപരിയായനാമസ്സ അസ്സമേധവികപ്പസ്സേതം അധിവചനം. മഹാരമ്ഭാതി മഹാകിച്ചാ മഹാകരണീയാ. അപിച പാണാതിപാതസമാരമ്ഭസ്സ മഹന്തതായപി മഹാരമ്ഭായേവ. ന തേ ഹോന്തി മഹപ്ഫലാതി ഏത്ഥ നിരവസേസത്ഥേ സാവസേസരൂപനം കതം. തസ്മാ ഇട്ഠഫലേന നിപ്ഫലാവ ഹോന്തീതി അത്ഥോ. ഇദഞ്ച പാണാതിപാതസമാരമ്ഭമേവ സന്ധായ വുത്തം. യം പന തത്ഥ അന്തരന്തരാ ദാനം ദിയ്യതി, തം ഇമിനാ സമാരമ്ഭേന ഉപഹതത്താ മഹപ്ഫലം ന ഹോതി, മന്ദഫലം ഹോതീതി അത്ഥോ. ഹഞ്ഞരേതി ഹഞ്ഞന്തി. യജന്തി അനുകുലം സദാതി യേ അഞ്ഞേ അനുകുലം യജന്തി, പുബ്ബപുരിസേഹി യിട്ഠത്താ പച്ഛിമപുരിസാപി യജന്തീതി അത്ഥോ. സേയ്യോ ഹോതീതി വിസേസോവ ഹോതി. ന പാപിയോതി പാപം കിഞ്ചി ന ഹോതി.