൬. കടുവിയസുത്തവണ്ണനാ

൧൨൯. ഛട്ഠേ ഗോയോഗപിലക്ഖസ്മിന്തി ഗാവീനം വിക്കയട്ഠാനേ ഉട്ഠിതപിലക്ഖസ്സ സന്തികേ. രിത്തസ്സാദന്തി ഝാനസുഖാഭാവേന രിത്തസ്സാദം. ബാഹിരസ്സാദന്തി കാമഗുണസുഖവസേന ബാഹിരസ്സാദം. കടുവിയന്തി ഉച്ഛിട്ഠം. ആമഗന്ധേനാതി കോധസങ്ഖാതേന വിസ്സഗന്ധേന. അവസ്സുതന്തി തിന്തം. മക്ഖികാതി കിലേസമക്ഖികാ. നാനുപതിസ്സന്തീതി ഉട്ഠായ ന അനുബന്ധിസ്സന്തി. നാന്വാസ്സവിസ്സന്തീതി അനുബന്ധിത്വാ ന ഖാദിസ്സന്തി. സംവേഗമാപാദീതി സോതാപന്നോ ജാതോ.

കടുവിയകതോതി ഉച്ഛിട്ഠകതോ. ആരകാ ഹോതീതി ദൂരേ ഹോതി. വിഘാതസ്സേവ ഭാഗവാതി ദുക്ഖസ്സേവ ഭാഗീ. ചരേതീതി ചരതി ഗച്ഛതി. ദുമ്മേധോതി ദുപ്പഞ്ഞോ. ഇമസ്മിം സുത്തേ വട്ടമേവ കഥിതം, ഗാഥാസു വട്ടവിവട്ടം കഥിതന്തി. സത്തമേ വട്ടമേവ ഭാസിതം.