൪. പരിസാസുത്തവണ്ണനാ

൯൬. ചതുത്ഥേ ന ബാഹുലികാ ഹോന്തീതി പച്ചയബാഹുല്ലികാ ന ഹോന്തി. ന സാഥലികാതി തിസ്സോ സിക്ഖാ സിഥിലം കത്വാ ന ഗണ്ഹന്തി. ഓക്കമനേ നിക്ഖിത്തധുരാതി ഓക്കമനം വുച്ചതി അവഗമനട്ഠേന പഞ്ച നീവരണാനി, തേസു നിക്ഖിത്തധുരാ. പവിവേകേ പുബ്ബങ്ഗമാതി കായചിത്തഉപധിവിവേകസങ്ഖാതേ തിവിധേപി വിവേകേ പുബ്ബങ്ഗമാ. വീരിയം ആരഭന്തീതി ദുവിധമ്പി വീരിയം പഗ്ഗണ്ഹന്തി. അപ്പത്തസ്സാതി ഝാനവിപസ്സനാമഗ്ഗഫലസങ്ഖാതസ്സ അപ്പത്തവിസേസസ്സ. സേസപദദ്വയേപി ഏസേവ നയോ. പച്ഛിമാ ജനതാതി സദ്ധിവിഹാരികഅന്തേവാസികാദയോ. ദിട്ഠാനുഗതിം ആപജ്ജതീതി ആചരിയുപജ്ഝായേഹി കതം അനുകരോതി. യം തായ ജനതായ ആചരിയുപജ്ഝായേസു ദിട്ഠം, തസ്സ അനുഗതിം ആപജ്ജതി നാമ. അയം വുച്ചതി, ഭിക്ഖവേ, അഗ്ഗവതീ പരിസാതി, ഭിക്ഖവേ, അയം പരിസാ അഗ്ഗപുഗ്ഗലവതീ നാമ വുച്ചതി.

ഭണ്ഡനജാതാതി ജാതഭണ്ഡനാ. കലഹജാതാതി ജാതകലഹാ. ഭണ്ഡനന്തി ചേത്ഥ കലഹസ്സ പുബ്ബഭാഗോ, ഹത്ഥപരാമാസാദിവസേന വീതിക്കമോ കലഹോ നാമ. വിവാദാപന്നാതി വിരുദ്ധവാദം ആപന്നാ. മുഖസത്തീഹീതി ഗുണവിജ്ഝനട്ഠേന ഫരുസാ വാചാ ‘‘മുഖസത്തിയോ’’തി വുച്ചന്തി, താഹി മുഖസത്തീഹി. വിതുദന്താ വിഹരന്തീതി വിജ്ഝന്താ വിചരന്തി.

സമഗ്ഗാതി സഹിതാ. സമ്മോദമാനാതി സമപ്പവത്തമോദാ. ഖീരോദകീഭൂതാതി ഖീരോദകം വിയ ഭൂതാ. പിയചക്ഖൂഹീതി ഉപസന്തേഹി മേത്തചക്ഖൂഹി. പീതി ജായതീതി പഞ്ചവണ്ണാ പീതി ഉപ്പജ്ജതി. കായോ പസ്സമ്ഭതീതി നാമകായോപി രൂപകായോപി വിഗതദരഥോ ഹോതി. പസ്സദ്ധകായോതി അസാരദ്ധകായോ. സുഖം വേദിയതീതി കായികചേതസികസുഖം വേദിയതി. സമാധിയതീതി ആരമ്മണേ സമ്മാ ഠപീയതി.

ഥുല്ലഫുസിതകേതി മഹാഫുസിതകേ. പബ്ബതകന്ദരപദരസാഖാതി ഏത്ഥ കന്ദരോ നാമ ‘‘ക’’ന്തി ലദ്ധനാമേന ഉദകേന ദാരിതോ ഉദകഭിന്നോ പബ്ബതപ്പദേസോ, യോ ‘‘നിതമ്ഭോ’’തിപി ‘‘നദികുഞ്ജോ’’തിപി വുച്ചതി. പദരം നാമ അട്ഠ മാസേ ദേവേ അവസ്സന്തേ ഫലിതോ ഭൂമിപ്പദേസോ. സാഖാതി കുസോബ്ഭഗാമിനിയോ ഖുദ്ദകമാതികായോ. കുസോബ്ഭാതി ഖുദ്ദകആവാടാ. മഹാസോബ്ഭാതി മഹാആവാടാ. കുന്നദിയോതി ഖുദ്ദകനദിയോ. മഹാനദിയോതി ഗങ്ഗായമുനാദികാ മഹാസരിതാ.