൫-൭. പഠമആജാനീയസുത്താദിവണ്ണനാ

൯൭-൯൯. പഞ്ചമേ അങ്ഗേഹീതി ഗുണങ്ഗേഹി. രാജാരഹോതി രഞ്ഞോ അരഹോ അനുച്ഛവികോ. രാജഭോഗ്ഗോതി രഞ്ഞോ ഉപഭോഗഭൂതോ. രഞ്ഞോ അങ്ഗന്തി രഞ്ഞോ ഹത്ഥപാദാദിഅങ്ഗസമതായ അങ്ഗന്തേവ സങ്ഖം ഗച്ഛതി. വണ്ണസമ്പന്നോതി സരീരവണ്ണേന സമ്പന്നോ. ബലസമ്പന്നോതി കായബലേന സമ്പന്നോ. ആഹുനേയ്യോതി ആഹുതിസങ്ഖാതം പിണ്ഡപാതം പടിഗ്ഗഹേതും യുത്തോ. പാഹുനേയ്യോതി പാഹുനകഭത്തസ്സ അനുച്ഛവികോ. ദക്ഖിണേയ്യോതി ദസവിധദാനവത്ഥുപരിച്ചാഗവസേന സദ്ധാദാനസങ്ഖാതായ ദക്ഖിണായ അനുച്ഛവികോ. അഞ്ജലികരണീയോതി അഞ്ജലിപഗ്ഗഹണസ്സ അനുച്ഛവികോ. അനുത്തരം പുഞ്ഞക്ഖേത്തം ലോകസ്സാതി സബ്ബലോകസ്സ അസദിസം പുഞ്ഞവിരുഹനട്ഠാനം.

വണ്ണസമ്പന്നോതി ഗുണവണ്ണേന സമ്പന്നോ. ബലസമ്പന്നോതി വീരിയബലേന സമ്പന്നോ. ജവസമ്പന്നോതി ഞാണജവേന സമ്പന്നോ. ഥാമവാതി ഞാണഥാമേന സമന്നാഗതോ. ദള്ഹപരക്കമോതി ഥിരപരക്കമോ. അനിക്ഖിത്തധുരോതി അട്ഠപിതധുരോ പഗ്ഗഹിതധുരോ, അഗ്ഗഫലം അരഹത്തം അപ്പത്വാ വീരിയധുരം ന നിക്ഖിപിസ്സാമീതി ഏവം പടിപന്നോ. ഇമസ്മിം സുത്തേ ചതുസച്ചവസേന സോതാപത്തിമഗ്ഗോ, സോതാപത്തിമഗ്ഗേന ച ഞാണജവസമ്പന്നതാ കഥിതാതി. ഛട്ഠേ തീണി ച മഗ്ഗാനി തീണി ച ഫലാനി, തീഹി മഗ്ഗഫലേഹി ച ഞാണജവസമ്പന്നതാ കഥിതാ. സത്തമേ അരഹത്തഫലം, അരഹത്തഫലേനേവ ച മഗ്ഗകിച്ചം കഥിതം. ഫലം പന ജവിതജവേന ഉപ്പജ്ജനതോ ജവോതി ച വത്തും വട്ടതി.