൩. മഹാനാമസക്കസുത്തവണ്ണനാ

൭൪. തതിയേ ഗിലാനാ വുട്ഠിതോതി ഗിലാനോ ഹുത്വാ വുട്ഠിതോ. ഗേലഞ്ഞാതി ഗിലാനഭാവതോ. ഉപസങ്കമീതി ഭുത്തപാതരാസോ മാലാഗന്ധാദീനി ആദായ മഹാപരിവാരപരിവുതോ ഉപസങ്കമി. ബാഹായം ഗഹേത്വാതി ന ബാഹായം ഗഹേത്വാ ആകഡ്ഢി, നിസിന്നാസനതോ വുട്ഠായ തസ്സ സന്തികം ഗന്ത്വാ ദക്ഖിണബാഹായം അങ്ഗുട്ഠകേന സഞ്ഞം ദത്വാ ഏകമന്തം അപനേസീതി വേദിതബ്ബോ. അഥസ്സ ‘‘സേഖമ്പി ഖോ, മഹാനാമ, സീല’’ന്തിആദിനാ നയേന സത്തന്നം സേഖാനം സീലഞ്ച സമാധിഞ്ച പഞ്ഞഞ്ച കഥേത്വാ ഉപരി അരഹത്തഫലവസേന അസേഖാ സീലസമാധിപഞ്ഞായോ കഥേന്തോ – ‘‘സേഖസമാധിതോ സേഖം വിപസ്സനാഞാണം അസേഖഞ്ച ഫലഞാണം പച്ഛാ, സേഖവിപസ്സനാഞാണതോ ച അസേഖഫലസമാധി പച്ഛാ ഉപ്പജ്ജതീ’’തി ദീപേസി. യാനി പന സമ്പയുത്താനി സമാധിഞാണാനി, തേസം അപച്ഛാ അപുരേ ഉപ്പത്തി വേദിതബ്ബാതി.