(൩൫. ക) അയോനിസോ മനസികാരോ

൯൩൬. തത്ഥ കതമോ അയോനിസോ മനസികാരോ? അനിച്ചേ ‘‘നിച്ച’’ന്തി അയോനിസോ മനസികാരോ, ദുക്ഖേ ‘‘സുഖ’’ന്തി അയോനിസോ മനസികാരോ, അനത്തനി ‘‘അത്താ’’തി അയോനിസോ മനസികാരോ, അസുഭേ ‘‘സുഭ’’ന്തി അയോനിസോ മനസികാരോ, സച്ചവിപ്പടികുലേന വാ ചിത്തസ്സ ആവട്ടനാ അനാവട്ടനാ ആഭോഗോ സമന്നാഹാരോ മനസികാരോ – അയം വുച്ചതി ‘‘അയോനിസോ മനസികാരോ’’.

(ഖ) കുമ്മഗ്ഗസേവനാ

തത്ഥ കതമാ കുമ്മഗ്ഗസേവനാ? തത്ഥ കതമോ കുമ്മഗ്ഗോ? മിച്ഛാദിട്ഠി, മിച്ഛാസങ്കപ്പോ, മിച്ഛാവാചാ, മിച്ഛാകമ്മന്തോ, മിച്ഛാആജീവോ, മിച്ഛാവായാമോ, മിച്ഛാസതി, മിച്ഛാസമാധി – അയം വുച്ചതി ‘‘കുമ്മഗ്ഗോ’’. യാ ഇമസ്സ കുമ്മഗ്ഗസ്സ സേവനാ നിസേവനാ സംസേവനാ ഭജനാ സമ്ഭജനാ ഭത്തി സമ്ഭത്തി തംസമ്പവങ്കതാ – അയം വുച്ചതി ‘‘കുമ്മഗ്ഗസേവനാ’’.

(ഗ) ചേതസോ ച ലീനത്തം

തത്ഥ കതമം ചേതസോ ച ലീനത്തം? യാ ചിത്തസ്സ അകല്യതാ അകമ്മഞ്ഞതാ ഓലീയനാ സല്ലീയനാ ലീനം ലീയനാ ലീയിതത്തം ഥിനം ഥിയനാ ഥിയിതത്തം ചിത്തസ്സ – ഇദം വുച്ചതി ‘‘ചേതസോ ച ലീനത്തം’’.

തികം.