൭. ഖലുപച്ഛാഭത്തികങ്ഗകഥാവണ്ണനാ

൩൦. ഭുഞ്ജന്തസ്സ യം ഉപനീതം, തസ്സ പടിക്ഖേപേന തം അതിരിത്തം ഭോജനന്തി അതിരിത്തഭോജനം. പുന ഭോജനം കപ്പിയം കാരേത്വാ ന ഭുഞ്ജിതബ്ബം, തബ്ബിസയത്താ ഇമസ്സ ധുതങ്ഗസ്സ. തേനാഹ ‘‘ഇദമസ്സ വിധാന’’ന്തി. യസ്മിം ഭോജനേതി യസ്മിം ഭുഞ്ജിയമാനേ ഭോജനേ. തദേവ ഭുഞ്ജതി, ന അഞ്ഞം. അനതിരിത്തഭോജനപച്ചയാ ആപത്തി അനതിരിത്തഭോജനാപത്തി, തതോ ദൂരീഭാവോ അനാപജ്ജനം. ഓദരികത്തം ഘസ്മരഭാവോ കുച്ഛിപൂരകതാ, തസ്സ അഭാവോ ഏകപിണ്ഡേനാപി യാപനതോ. നിരാമിസസന്നിധിതാ നിഹിതസ്സ അഭുഞ്ജനതോ. പുന പരിയേസനവസേന പരിയേസനായ ഖേദം ന യാതി. അഭിസല്ലേഖകാനം സന്തോസഗുണാദീനം വുദ്ധിയാ സഞ്ജനനം സന്തോസഗുണാദിവുഡ്ഢിസഞ്ജനനം. ഇദന്തി ഖലുപച്ഛാഭത്തികങ്ഗം.

ഇതി ഖലുപച്ഛാഭത്തികങ്ഗകഥാവണ്ണനാ.