൪. സപദാനചാരികങ്ഗകഥാവണ്ണനാ

൨൭. ഇമിനാതി സപദാനചാരികേന. കാലതരന്തി കാലസ്സേവ. അഫാസുകട്ഠാനന്തി സപരിസ്സയാദിവസേന ദുപ്പവേസനട്ഠാനം. പുരതോതി വീഥിയം ഗച്ഛന്തസ്സ പുരതോ ഘരം അപവിട്ഠസ്സേവ. പത്തവിസ്സട്ഠട്ഠാനന്തി പേസകാരവീഥിയം പേസകാരഭാവം നിമ്മിനിത്വാ ഠിതസ്സ സക്കസ്സ ഘരദ്വാരേ പത്തവിസ്സട്ഠട്ഠാനം. ഉക്കട്ഠപിണ്ഡപാതികോ തം ദിവസം ന ഭിക്ഖം ആഗമയമാനോ നിസീദതി, തസ്മാ തം അനുലോമേതി. കത്ഥചിപി കുലേ നിബദ്ധം ഉപസങ്കമനാഭാവതോ പരിചയാഭാവേന കുലേസു നിച്ചനവകതാ. സബ്ബത്ഥ അലഗ്ഗമാനസതായ ച സോമ്മഭാവേന ച ചന്ദൂപമതാ. കുലേസു പരിഗ്ഗഹചിത്താഭാവേന തത്ഥ മച്ഛേരപ്പഹാനം. ഹിതേസിതായ വിഭാഗാഭാവതോ സമാനുകമ്പിതാ. കുലാനം സങ്ഗണ്ഹനസംസട്ഠതാദയോ കുലൂപകാദീനവാ. അവ്ഹാനാനഭിനന്ദനാതി നിമന്തനവസേന അവ്ഹാനസ്സ അസമ്പടിച്ഛനാ. അഭിഹാരേനാതി ഭിക്ഖാഭിഹാരേന. സേരിചാരന്തി യഥാരുചി വിചരണം.

ഇതി സപദാനചാരികങ്ഗകഥാവണ്ണനാ.