൨. തേചീവരികങ്ഗകഥാ

൨൫. തദനന്തരം പന തേചീവരികങ്ഗം ‘‘ചതുത്ഥകചീവരം പടിക്ഖിപാമി, തേചീവരികങ്ഗം സമാദിയാമീ’’തി ഇമേസം അഞ്ഞതരവചനേന സമാദിന്നം ഹോതി.

തേന പന തേചീവരികേന ചീവരദുസ്സം ലഭിത്വാ യാവ അഫാസുകഭാവേന കാതും വാ ന സക്കോതി, വിചാരകം വാ ന ലഭതി, സൂചിആദീസു വാസ്സ കിഞ്ചി ന സമ്പജ്ജതി, താവ നിക്ഖിപിതബ്ബം. നിക്ഖിത്തപച്ചയാ ദോസോ നത്ഥി. രജിതകാലതോ പന പട്ഠായ നിക്ഖിപിതും ന വട്ടതി, ധുതങ്ഗചോരോ നാമ ഹോതി. ഇദമസ്സ വിധാനം.

പഭേദതോ പന അയമ്പി തിവിധോ ഹോതി. തത്ഥ ഉക്കട്ഠേന രജനകാലേ പഠമം അന്തരവാസകം വാ ഉത്തരാസങ്ഗം വാ രജിത്വാ തം നിവാസേത്വാ ഇതരം രജിതബ്ബം. തം പാരുപിത്വാ സങ്ഘാടി രജിതബ്ബാ. സങ്ഘാടിം പന നിവാസേതും ന വട്ടതി. ഇദമസ്സ ഗാമന്തസേനാസനേ വത്തം. ആരഞ്ഞകേ പന ദ്വേ ഏകതോ ധോവിത്വാ രജിതും വട്ടതി. യഥാ പന കഞ്ചി ദിസ്വാ സക്കോതി കാസാവം ആകഡ്ഢിത്വാ ഉപരികാതും, ഏവം ആസന്നേ ഠാനേ നിസീദിതബ്ബം. മജ്ഝിമസ്സ രജനസാലായം രജനകാസാവം നാമ ഹോതി, തം നിവാസേത്വാ വാ പാരുപിത്വാ വാ രജനകമ്മം കാതും വട്ടതി. മുദുകസ്സ സഭാഗഭിക്ഖൂനം ചീവരാനി നിവാസേത്വാ വാ പാരുപിത്വാ വാ രജനകമ്മം കാതും വട്ടതി. തത്രട്ഠകപച്ചത്ഥരണമ്പി തസ്സ വട്ടതി. പരിഹരിതും പന ന വട്ടതി. സഭാഗഭിക്ഖൂനം ചീവരമ്പി അന്തരന്തരാ പരിഭുഞ്ജിതും വട്ടതി. ധുതങ്ഗതേചീവരികസ്സ പന ചതുത്ഥം വത്തമാനം അംസകാസാവമേവ വട്ടതി. തഞ്ച ഖോ വിത്ഥാരതോ വിദത്ഥി, ദീഘതോ തിഹത്ഥമേവ വട്ടതി.

ഇമേസം പന തിണ്ണമ്പി ചതുത്ഥകചീവരം സാദിതക്ഖണേയേവ ധുതങ്ഗം ഭിജ്ജതി. അയമേത്ഥ ഭേദോ.

അയം പനാനിസംസോ, തേചീവരികോ ഭിക്ഖു സന്തുട്ഠോ ഹോതി കായപരിഹാരികേന ചീവരേന. തേനസ്സ പക്ഖിനോ വിയ സമാദായേവ ഗമനം, അപ്പസമാരമ്ഭതാ, വത്ഥസന്നിധിപരിവജ്ജനം, സല്ലഹുകവുത്തിതാ, അതിരേകചീവരലോലുപ്പപ്പഹാനം, കപ്പിയേ മത്തകാരിതായ സല്ലേഖവുത്തിതാ, അപ്പിച്ഛതാദീനം ഫലനിപ്ഫത്തീതി ഏവമാദയോ ഗുണാ സമ്പജ്ജന്തീതി.

അതിരേകവത്ഥതണ്ഹം, പഹായ സന്നിധിവിവജ്ജിതോ ധീരോ;

സന്തോസസുഖരസഞ്ഞൂ, തിചീവരധരോ ഭവതി യോഗീ.

തസ്മാ സപത്തചരണോ, പക്ഖീവ സചീവരോവ യോഗിവരോ;

സുഖമനുവിചരിതുകാമോ, ചീവരനിയമേ രതിം കയിരാതി.

അയം തേചീവരികങ്ഗേ സമാദാനവിധാനപ്പഭേദഭേദാനിസംസവണ്ണനാ.