൧൦. അബ്ഭോകാസികങ്ഗകഥാ

൩൩. അബ്ഭോകാസികങ്ഗമ്പി ‘‘ഛന്നഞ്ച രുക്ഖമൂലഞ്ച പടിക്ഖിപാമി, അബ്ഭോകാസികങ്ഗം സമാദിയാമീ’’തി ഇമേസം അഞ്ഞതരവചനേന സമാദിന്നം ഹോതി.

തസ്സ പന അബ്ഭോകാസികസ്സ ധമ്മസ്സവനായ വാ ഉപോസഥത്ഥായ വാ ഉപോസഥാഗാരം പവിസിതും വട്ടതി. സചേ പവിട്ഠസ്സ ദേവോ വസ്സതി, ദേവേ വസ്സമാനേ അനിക്ഖമിത്വാ വസ്സൂപരമേ നിക്ഖമിതബ്ബം. ഭോജനസാലം വാ അഗ്ഗിസാലം വാ പവിസിത്വാ വത്തം കാതും, ഭോജനസാലായ ഥേരേ ഭിക്ഖൂ ഭത്തേന ആപുച്ഛിതും, ഉദ്ദിസന്തേന വാ ഉദ്ദിസാപേന്തേന വാ ഛന്നം പവിസിതും, ബഹി ദുന്നിക്ഖിത്താനി മഞ്ചപീഠാദീനി അന്തോ പവേസേതുഞ്ച വട്ടതി. സചേ മഗ്ഗം ഗച്ഛന്തേന വുഡ്ഢതരാനം പരിക്ഖാരോ ഗഹിതോ ഹോതി, ദേവേ വസ്സന്തേ മഗ്ഗമജ്ഝേ ഠിതം സാലം പവിസിതും വട്ടതി. സചേ ന കിഞ്ചി ഗഹിതം ഹോതി, സാലായ ഠസ്സാമീതി വേഗേന ഗന്തും ന വട്ടതി. പകതിഗതിയാ ഗന്ത്വാ പവിട്ഠേന പന യാവ വസ്സൂപരമാ ഠത്വാ ഗന്തബ്ബന്തി ഇദമസ്സ വിധാനം. രുക്ഖമൂലികസ്സാപി ഏസേവ നയോ.

പഭേദതോ പന അയമ്പി തിവിധോ ഹോതി. തത്ഥ ഉക്കട്ഠസ്സ രുക്ഖം വാ പബ്ബതം വാ ഗേഹം വാ ഉപനിസ്സായ വസിതും ന വട്ടതി. അബ്ഭോകാസേയേവ ചീവരകുടിം കത്വാ വസിതബ്ബം. മജ്ഝിമസ്സ രുക്ഖപബ്ബതഗേഹാനി ഉപനിസ്സായ അന്തോ അപ്പവിസിത്വാ വസിതും വട്ടതി. മുദുകസ്സ അച്ഛന്നമരിയാദം പബ്ഭാരമ്പി സാഖാമണ്ഡപോപി പീഠപടോപി ഖേത്തരക്ഖകാദീഹി ഛഡ്ഡിതാ തത്രട്ഠകകുടികാപി വട്ടതീതി.

ഇമേസം പന തിണ്ണമ്പി വാസത്ഥായ ഛന്നം വാ രുക്ഖമൂലം വാ പവിട്ഠക്ഖണേ ധുതങ്ഗം ഭിജ്ജതി. ജാനിത്വാ തത്ഥ അരുണം ഉട്ഠാപിതമത്തേതി അങ്ഗുത്തരഭാണകാ. അയമേത്ഥ ഭേദോ.

അയം പനാനിസംസോ, ആവാസപലിബോധുപച്ഛേദോ, ഥിനമിദ്ധപനൂദനം, ‘‘മിഗാ വിയ അസങ്ഗചാരിനോ, അനികേതാ വിഹരന്തി ഭിക്ഖവോ’’തി (സം. നി. ൧.൨൨൪) പസംസായ അനുരൂപതാ, നിസ്സങ്ഗതാ, ചാതുദ്ദിസതാ, അപ്പിച്ഛതാദീനം അനുലോമവുത്തിതാതി.

അനഗാരിയഭാവസ്സ, അനുരൂപേ അദുല്ലഭേ;

താരാമണിവിതാനമ്ഹി, ചന്ദദീപപ്പഭാസിതേ.

അബ്ഭോകാസേ വസം ഭിക്ഖു, മിഗഭൂതേന ചേതസാ;

ഥിനമിദ്ധം വിനോദേത്വാ, ഭാവനാരാമതം സിതോ.

പവിവേകരസസ്സാദം, നചിരസ്സേവ വിന്ദതി;

യസ്മാ തസ്മാ ഹി സപ്പഞ്ഞോ, അബ്ഭോകാസരതോ സിയാതി.

അയം അബ്ഭോകാസികങ്ഗേ സമാദാനവിധാനപ്പഭേദഭേദാനിസംസവണ്ണനാ.