൩൬. മോരിയബ്രഹ്മണസ്സ വത്ഥുമ്ഹി അയമാനുപുബ്ബീകഥാ

അമ്ഹാകം ഭഗവതി പരിനിബ്ബുതേ മഗധരട്ഠേ മചലം നാമ മഹാഗാമം അഹോസി. തത്ഥ മോരിയോനാമ ബ്രാഹ്മണോ പടിവസതി സദ്ധോ പസന്നോ, തസ്സ സേനാനാമേ കാ ഭരിയാ അത്ഥി. സാപി സദ്ധാ പസന്നാ രതനത്തയേസു. തേ ഉഭോപി സമഗ്ഗാ സമ്മോദമാനാ ഭിക്ഖുസങ്ഘം നിമന്തേത്വാ നിച്ചം ദാനം പവത്തേന്താ ചീവരാദിചതുപച്ചയേഹി ഉപട്ഠഹന്താ സീലം രക്ഖന്താ ഉപോസഥകമ്മം കരോന്താ ദിവസം വീതിനാമേന്തി. അഥസ്സ ഗേഹേ വിഭവം യേഭുയ്യേന ദാനാദീസു പരിക്ഖയമഗമാസി. തതോ ബ്രാഹ്മണീ സാമി നോ ഗേഹേ ധനം പരിക്ഖീണം. കഥം ദാനം പവത്തേയ്യാമാതി ബ്രാഹ്മണസ്സ ആരോചേസി, തതോ ബ്രാഹ്മണോ മാ ഭദ്ദേ ചിന്തേസി. യേനകേനചി ഉപായേന ദാനം പതിട്ഠപേസ്സാമാതി വത്വാ തസ്മിംയേവ അത്തനോ സഉസ്സാഹതം പകാസോന്തോ ആഹ.

൧. ജാനമാനോ ഹി ലോകസ്മിം, ദാനസ്സേദം ഫലം ഇതി;

ന ദജ്ജാ കോ സുസീലേസു, അപ്പമ്പി ദിവസമ്പതി.

൨. സഗ്ഗലോകനിദാനാനി, ദാനാനി മതിമാ ഇധ;

കോഹിനാമ നരോ ലോകേ, ന ദദേയ്യ ഹിതേ രതോതി.

ഏവഞ്ച പന വത്വാ ഭദ്ദേ വനം പവിസിത്വാ അനേകവിധാനി പണ്ണാനി ച ഫലാനി ച പച്ഛിപൂരം ആഹരിത്വാ വിക്കിണിത്വാപി ദാനം ന ഉപച്ഛിന്ദിസ്സാമാതി വത്വാ തതോ പട്ഠായ വനം ഗന്ത്വാ പണ്ണാനി ച ഫലാനി ച ആഹരിത്വാ വിക്കിണിത്വാ ദാനം ദേന്തോ പടിവസതി. അഥേകദിവസം ബ്രാഹ്മണോ വനം പവിട്ഠോ പണ്ണേഹി ച ഫലേഹി ച പച്ഛിം പൂരേത്വാ സീസേനാ ദായ ഗേഹം ആഗച്ഛന്തോ പുപ്ഫഫലപല്ലവേഹി വിനതം നേകതരുഗണനിചിതം സമ്മത്താനേകചാതകചതുപ്പദനിസേവിതം വിപ്പകിണ്ണാനന്തപുപ്ഫപത്തകിഞ്ജക്ഖച്ഛന്നവാളുകാതലം സന്ദമാനസീതലാ മലജലപ്പവാഹം അകദ്ദമാനിന്നസുപതിത്തേഹി സുന്ദരം കന്ദരം ദിസ്വാ പച്ഛിം തീരേ ഠപേത്വാ ഓതിണ്ണോ നഹായതി, തസ്മിം ഖണേ തത്ഥ ഏകസ്മിം രുക്ഖേ അധിവത്ഥോ ദേവപുത്തോ തം തത്ഥ നഹായന്തം ദിസ്വാ കിന്നു ഖോ ഏസ കല്യാണജ്ഝാസയോ വാ ഉദാഹു പാപജ്ഝാസയോ സത്തോതി ദിബ്ബചക്ഖുനാ ഉപധാരന്തോ അച്ഛരിയപുരിസോ ഏസോ ദുഗ്ഗതോപി ഹുത്വാ അത്തനോ ദാനപ്പവേണിയാ ഉപച്ഛിജ്ജനഭയേന വനം ഗന്ത്വാ പണ്ണാനി ച ഫലാനി ച ആഹരിത്വാ ദുക്ഖേന കസിരേന ജീവികം കപ്പേന്തോ ദാനധമ്മം ന ഉപച്ഛിന്ദതീതി ചിന്തേത്വാ തസ്സ ഗുണാദയോ പടിച്ച പച്ഛിയം ഠപിതപണ്ണാനി ച ഫലാനി ച സബ്ബാനി സുവണ്ണാനി ഹോന്തൂതി അധിട്ഠാസി. അഥസ്സാനുഭാവേന സബ്ബം സുവണ്ണം അഹോഭി, അഥ സോ സുവണ്ണപുണ്ണപച്ഛിയം ഉപരി സുവണ്ണരാസിമത്ഥകേ സബ്ബകാമദദം മഹന്തം മണിരതനം ഠപേത്വാ അന്തരഹിതോ പടിക്കമ്മ അട്ഠാസി, തതോ ബ്രാഹ്മണോ നഹാത്വാ ഉത്തിണ്ണോ പച്ഛിയം സമ്പുണ്ണസുവണ്ണവണ്ണരംസിനാ സമ്ഭിന്നവിജ്ജോതമാനമണിരതനം ദിസ്വാ കിമേതംതി ആസങ്കിതപരിസങ്കിതോ പച്ഛിസമീപം ഗന്ത്വാ ഹത്ഥം പസാരേതും അവിസഹന്തോ അട്ഠാസി. തം ദിസ്വാ ദേവപുത്തോ ദിസ്സമാനസരീരേന ഠത്വാ മാ ത്വം ഭായി ബ്രാഹ്മണ. മയാ ഏതാനി നിമ്മിതാനി, ഗഹേത്വാ ഗച്ഛാഹീതി ആഹ, അഥ ബ്രാഹ്മണോ ദേവപുത്തസ്സ കഥം സുത്വാ അയം ദേവപുത്തോ ഇമം മയാ നിമ്മിതം, ഗഹേത്വാ ഗച്ഛാതി വദതി. കിന്നു ഖോ സോ അത്തനോ ആനുഭാവേന ദേതി, ഉദാഹു മയാ കതപുഞ്ഞേനാതി പുച്ഛിസ്സാമി തംതി പഞ്ജലികോവ ദേവപുത്തം പുച്ഛന്തോ ആഹ.

൩. പുച്ഛാമി പഞ്ജലീ ദാനി, ദേവപുത്ത മഹിദ്ധിക;

ദദാസി മേ സുവണ്ണഞ്ച, കാമദം മണിമുത്തമം.

൪. നാപി കോ നോ തുവം ഞാതി,

ന മിത്തോ നോപകാരകോ;

കിം ത്വം അത്ഥവസം ദിസ്വാ,

മമ ദജ്ജാസിമം ധനം.

൫. കേന തപേന സീലേന, കേനാചാരഗുണേന ച;

യേന ദജ്ജാസി മേ ദേവ, കിം മേ സുചരിതം ചിതം.

൬. കിന്നു പുരാതനം കമ്മം, കേന കമ്മേന ദസ്സസി;

അഥവാ തവിദ്ധിയാ ദേസി, തം മേ അക്ഖാഹി പുച്ഛിതോതി.

തതോ ദേവപുത്തോ ന ഖോ പനാഹം ബ്രാഹ്മണ ദേവോതി പരേസം കിഞ്ചി ദാതും സക്കോമി, തയാ പുബ്ബേ കതസുചരിതാനുഭാവേന നിബ്ബത്തതീതി വത്വാ ദിബ്ബചക്ഖുനാ തസ്സ പുബ്ബകമ്മം ദിസ്വാ തസ്സ പകാസേന്തോ ആഹ.

൭. കസ്സപേ ലോകപജ്ജോതേ, സമ്ബുദ്ധേ പരിനിബ്ബുതേ;

സബ്ബത്ഥ പത്ഥടം ആസി, തസ്സ ബുദ്ധസ്സ സാസനം.

൮. തദാ പച്ചന്തിമേ ഗാമേ, ത്വമാസി കുലദാരകോ;

സദ്ധോ ആസി പസന്നോ ച, ദായകോ കുസലേ രതോ.

൯. തദാ പബ്ബജിതോ ഏകോ, ഗച്ഛന്തോ അന്തരാപഥേ;

ചോരേഹി അനുബദ്ധോസി, അച്ഛിന്നപത്തചീവരോ.

൧൦. സാഖാഭങ്ഗം നിവാസേത്വാ, പാരുപിത്വാ തഥേവ തം;

അന്തോഗാമം പവിട്ഠോസി, ഏസമാനോ പിലോതികേ.

൧൧. തതോ ത്വം ചരമാനം തം, ദിസ്വാ കമ്പിതമാനസോ;

വത്ഥയുഗം അദാസി ത്വം, സദ്ദഹം ദാനതോ ഫലം.

൧൨. പത്ഥോദനേന തം ഭിക്ഖും, പരിവിസിത്വാ യഥാബലം;

പേസേസി അഭിവാദേത്വാ, സദ്ധായ സുദ്ധമാനസോ.

൧൩. ഇമം ത്വം അകരീ പുഞ്ഞം, തുയ്ഹേതം ചരിതം ഇമം;

തസ്സ തേ പുഞ്ഞകമ്മസ്സ, അമുഖ്യഫല മീദിസംതി.

ഏവഞ്ച പന വത്വാ ഇദം തേ ബ്രാഹ്മണ ധനം രാജാദീഹി മയാ അനാഹരണീയം കതം, ത്വം അപരിസങ്കന്തോ ഗഹേത്വാ യഥാധിപ്പായം കരോഹി, ഇമം ഖോ പന മണിരതനം ഇച്ഛിതിച്ഛിതം പസവതി, തേനാപി ആനുഭാവേന തവ ദാനം അനുപച്ഛിന്ദന്തോ പുത്തദാരാദയോ പോസേഹീതി അനുസാസി, തം സുത്വാ ബ്രാഹ്മണോ തേന വുത്തനിയാമേനേവ ഭിക്ഖുസങ്ഘസ്സ മഹാദാനം ദദന്തോ സീലം രക്ഖന്തോ ചിരം വസിത്വാ അപരഭാഗേ തതോ ചുതോ ദേവലോകേ നിബ്ബത്തീതി.

൧൪. ഏവം നിഹീനാപീ ധനേന സന്തോ,

ദാനന്വയം നേവ പരിച്ചജന്തി;

തസ്മാ ഹി ഭോന്തോ സതി ദേയ്യധമ്മേ,

മാ കത്ഥ ദാനേസു പമാദഭാവംതി.

മോരിയബ്രാഹ്മണസ്സ വത്ഥും ഛട്ഠമം.