൩൭. പുത്തവത്ഥുമ്ഹി അയമാനുപുബ്ബീകഥാ

ഏകസ്മിം കിര സമയേ ലങ്കാദീപവാസിനോ സട്ഠിമത്താ ഭിക്ഖൂ ജയമഹാബോധിം വന്ദിതുകാമാ ഏകതോ മന്തേത്വാ മഹാതിത്ഥേന നാവം ആരുയ്ഹ ജമ്ബുദീപം പത്വാ താമലിത്തിപട്ഠേനേ [തമലിത്തപട്ടനേ ഇതികത്ഥചി] ഓതരിത്വാ അനുക്കമേന പാടലിപുത്തനഗരം പാപുണിംസു. അഥ തസ്മിം നഗരേ പിണ്ഡായ ചരന്തേ തേ ഭിക്ഖൂ ഏകോ ദുഗ്ഗതമനുസ്സോ ദിസ്വാ ചിരേന [ചിരേനാഹംദിട്ഠാ ഇതിസബ്ബത്ഥ] മയാ ദിട്ഠാ ബുദ്ധപുത്താതി സോമനസ്സോ ഭരിയം പക്കോസിത്വാ ഭദ്ദേ ഇമേസം അയ്യാനം ദാനം ദാതുകാമോമ്ഹി, പുബ്ബേ നോ അകതപുഞ്ഞത്താ ഇദാനി ദുഗ്ഗതാ ജാതാ, ഇമേസു പുഞ്ഞക്ഖേത്തേസു ബീജം നോ ചേ രോപേസ്സാമ, പുനപി ഏവമേവ ഭവിസ്സാമാതി വത്വാ കിം മേ ഗേഹേ ദേയ്യധമ്മം അത്ഥീതി പുച്ഛി. സാ തം സുത്വാ ഘരേ നോ സാമി അയ്യാനം കിഞ്ചി ദാതബ്ബം ന പസ്സാമി. അപി ച മമ പുത്തം മാരേത്വാ ദാനം ദാതും സക്കാതി. സോ തസ്സാ കഥം സുത്വാ ഭദ്ദേ പുത്തം മാരേത്വാ കിം ദാനം ദേമാതി ആഹ. തായ തം സുത്വാ സാമി കിം ന ജാനാസി, പുത്തേ നോ മതേ സന്ദിട്ഠസമ്ഭത്താ ഞാതിമിത്തസുഹജ്ജാ ച അമ്ഹാകം സന്തികം ആഗച്ഛാന്താ കിഞ്ചി പണ്ണാകാരം ഗഹേത്വാ ആഗച്ഛന്തി. മയം തേന പണ്ണാകാരേന ദാനം ദസ്സാമാതി വുത്തേ ഉപാസകോ സാധു തഥാ കരോഹീതി മാതുയാ ഏവ ഭാരമകാസി, സാ പുത്തം മാരേതും അവിസഹന്തീ ആഹ. തഥാ ഹി.

൧. കിച്ഛാ ലദ്ധം പിയം പുത്തം, അമ്മമ്മാതി പിയം വദം;

സുനീലനേത്തം സുഭമും, കോ പക്കമിതുമിച്ഛതി.

൨. മാതരാ മാരിയന്തോപി, മാതരമേവ രോദതി;

മാരേതും തം ന സക്കോമി, ഹദയം മേ പവേധതീതി.

ഏവഞ്ച പന വത്വാ അഹം സാമി ന സക്കോമി പുത്തം മാരേതും. ത്വം മാരേഹീതി പുത്തം പിതുസന്തികം പേസേസി. അഥ സോപി തം മാരേതു മസക്കോന്തോ ഏവമാഹ. വുത്തഞ്ഹി.

൩. തായന്തി പിതുനോ ദുക്ഖം, പുത്താ പുത്താതി കിത്തിതാ;

പിതു ദുക്ഖം സുഖം പുത്താ, ദായാദാ ഹോന്തി സബ്ബദാ.

൪. തസ്മാ മേ സദിസം പുത്തം, പില്ലകം മഞ്ജുഭാസനം;

ന സക്കോമി അഹം ഭദ്ദേ, ജീവിതാ തം വിയോജിതും.

൫. അയസഞ്ച അകിത്തിഞ്ച, പപ്പോതി പുത്തഘാതകോ;

പാണാതിപാതകമ്മമ്പി, കാമം സോ ഫുസതേ നരോതി.

ഏവഞ്ച പന വത്വാ സോ ത്വമേവ തവ പുത്തം മാരേഹീതി പേസേസി, ഏവം തേന വുത്തേ പുത്ഥസ്സ മാരപാണൂപായം പരിയേസന്താ ഏവമാഹംസു, അമ്ഹേ പനിമം മാരേതും ന സക്കോമി, അമ്ഹാകം പച്ഛാഗേഹേ മഹന്തോ വമ്മികോ അത്ഥി, തസ്മിം ഏകോ നാഗരാജാ പടിവസതി. കുമാരം തത്ഥ പേസേസ്സാമ, സോ തം ഡസിത്വാ മാരേസ്സതീതി. ഇച്ചേതേ ഏസോ ഖോ ഉപായോ ഏവാതി ചിന്തേത്വാ കുമാരം പക്കോസിത്വാ അഞ്ചനാ വലിവലയാദീഹി മണ്ഡേത്വാ തസ്സ ഹത്ഥേ ഗേണ്ഡും [തേണ്ഡും ഇതിസബ്ബത്ഥ] ഠപേത്വാ താത പച്ഛാഗേഹേ വമ്മികസമീപം ഗന്ത്വാ കീളാതി പേസേസും. തതോ ദാരകോ ഗന്ത്വാ ഗേണ്ഡുകേന കീളന്തോ വമ്മികബിലേ ഗേണ്ഡുകം പാതേസി. അഥ സോ ഗേണ്ഡുകം ഗണ്ഹിസ്സാമീതി വമ്മികസുസിരേ ഹത്ഥം പവേസേസി. തതോ സപ്പോ കുജ്ഝിത്വാ സുസൂതിസദ്ദം കരോന്തോ മഹന്തം ഫണം കത്വാ ബിലതോ സീസം ഉക്ഖിപിത്വാ ഓലോകേന്തോ അട്ഠാസി കുമാരസ്സ ഹത്ഥതോ പരിഗലിതപാസംവിയ. അഥസ്സ കുമാരോ കിഞ്ചി അജാനന്തോ സപ്പസ്സ ഗീവം ദള്ഹം ഗണ്ഹി. അഥസ്സ മാതാപിതുന്നം സദ്ധാബലേന നാഗരാജാ കുമാരസ്സ കരതലേ അട്ഠംസം ഇച്ഛാദായകം കണ്ഠമണിരതനം പാതേസി. കുമാരസ്സ മാതാപിതരോ ദ്വാരം നിസ്സായ ഠിതാ തസ്സ കിരിയം ഓലോകേന്തോ തം മണിരതനം ദിസ്വാ സീഘം ഗന്ത്വാ പുത്തം ഉക്ഖിപിത്വാ ഹത്ഥതോ മണിരതനം ഗണ്ഹിംസു. തതോ തേ തം മണിരതനം പരിസുദ്ധാസനേ ഠപേത്വാ ഉപചാരം കത്വാ അമ്ഹാകം ഇദഞ്ചിദഞ്ച ദേഥാതി അബ്ഭുക്കിരിംസു. അഥ തേ മണിരതനാനുഭാവേന ഗേഹദ്വാരേ മഹന്തം മണ്ഡപം കാരേത്വാ വിതാനാദിനാ മണ്ഡപം അലങ്കരിത്വാ ഭിക്ഖൂനം ആസനാനി പഞ്ഞാപേത്വാ തേ സട്ഠിമത്തേ ഭിക്ഖൂ നിസീദാപേത്വാ മഹാദാനം അദംസു. തതോ നഗരവാസിനോ മണിരതനാനുഭാവം സുത്വാ സന്നിപതിംസു. അഥ തേ തേസം മജ്ഝേ അത്തനോ സദ്ധാബലേന മണിരതനസ്സ ലാഭം പകാസേത്വാ ഇമഞ്ഹി ദാനത്ഥായേവ പരിച്ചജ്ജാമാതി ഏകസ്മിം ഠാനേ പതിട്ഠാപേത്വാ തേനാനുഭാവേന യാവജീവം ദാനം ദദന്താ സീലം രക്ഖന്താ ആയുപരിയോസാനേ ദേവലോകേ നിബ്ബത്തിംസൂതി.

൬. ഛേത്വാന പേമം അപി അത്രജേസു,

ദദന്തി ദാനം ഇധ മാനുസേവം;

ന ദദാതി കോ നാമ നരോ സമിദ്ധോ,

ദാനഞ്ഹി ദാനസ്സ ഫലം സരന്തോതി.

പുത്തവത്ഥും സത്തമം.