൩൫. സാഖമാലപൂജികായ വത്ഥുമ്ഹി അയമാനുപുബ്ബീകഥാ

അമ്ഹാകം ഭഗവാ ദസപാരമിയോ പൂരേത്വാ അനുക്കമേന തുസിതഭവനേ നിബ്ബത്തോ ദേവേഹി ആരാധിതോ സക്കരാജകുലേ പടിസന്ധിം ഗഹേത്വാ മാതുകുച്ഛിതോ നിക്ഖന്തോ അനുക്കമേന പരമാഭിസമ്ബോധിം പത്വാ തതോ പട്ഠായ പഞ്ചചത്താലീസസംവച്ഛരാനി ഠത്വാ ചതുരാസീതിധമ്മക്ഖന്ധസഹസ്സാനി ദേസേത്വാ ഗണനപഥമതീതേ സത്തേ ഭവകന്താരതോ സന്താരേത്വാ സബ്ബബുദ്ധകിച്ചാനി നിട്ഠാപേത്വാ കുസിനാരായം ഉപവത്തനേ മല്ലാനം സാലവനേ യമകസാലാന മന്തരേ ഉത്തരസീസകം പഞ്ഞത്തേ മഞ്ചകേ വേസാഖപുണ്ണദിവസേ ദക്ഖിണേന പസ്സേന സതോ സമ്പജാനോ അനുട്ഠാനസേയ്യായ നിപന്നോ പച്ഛിമയാമേ ഭിക്ഖൂ ഓവദിത്വാ ബലവപച്ചൂ-സ സമയേ മഹാപഥവിംകമ്പേന്തോ അനുപാദിസേസായ നിബ്ബാണധാതുയാ പരിനിബ്ബായി, നിബ്ബുതേ പന ഭഗവതി ലോകനാഥേ ആനന്ദത്ഥേരോ മല്ലരാജൂനം ഏതം പവത്തിം ആരോചേസി. തതോ കോസിനാരകാ ച ദേവബ്രഹ്മാദയോ ച സന്നിപതിത്വാ നച്ചഗീതവാദിതേഹി മാലാഗന്ധാദീഹി ച സക്കരോന്താ ഗരുകരോന്താ മാനേന്താ പൂജേന്താ ചേലവിതാനാദയോ കരോന്താ ഭഗവതോ സരീരം നഗരമജ്ഝേ യത്ഥ മകുടബന്ധനം നാമ മല്ലാനം ചേതിയം, തത്ഥ നേത്വാ ചക്കവത്തിസ്സ സരീരം വിയ അഹതേന വത്ഥേന വേഠേത്വാ തതോ വിഹതേന കപ്പാസേന വേഠേത്വാതി ഏവം പഞ്ചദുസ്സയുഗസതേഹി വേഠേത്വാ ആയസായ തേലദോണിയാ പക്ഖിപിത്വാ അഞ്ഞിസ്സായ ആയസായ ദോണിയാ പടികുജ്ജിത്വാ സബ്ബഗന്ധാനം ചിതകം കരിത്വാ ഭഗവതോ സരീരം ചിതകം ആരോപേസും. അഥ മഹാകസ്സപത്ഥേരേന ഭഗവതോ പാദേ സിരസാ വന്ദിതേ ദേവതാനുഭാവേന ചിതകോ സമന്താ ഏകപ്പഹാരേനേവ പജ്ജലി. ഭഗവതോ പന സരീരേ ദഡ്ഢേ സുമനമകുളസദിസാ ധാതുയോ അവസിസ്സിംസു. തസ്മിം കിര സമയേ കോസലരഞ്ഞോ ജനപദേ അഞ്ഞതരാ ഗാമവാസികാ ഇത്ഥീ ഭഗവതി പരിനിബ്ബുതേ സാധുകീള്ഹം ആഗച്ഛമാനാ അന്തരാമഗ്ഗേ അത്തനോ സരീരേ ഉപ്പന്നവാതരോഗേന ഉപദ്ദുതാ സാധുകീള്ഹം സമ്പാപുണിതും അസക്കോന്തീ സത്ഥു ആളാഹനം ഗന്ത്വാ ഭഗവതോ ധാതുസരീരേ തീണി സാഖപുപ്ഫാനി പൂജേത്വാ പസന്നമാനസാ പഞ്ചപതിട്ഠിതേന വന്ദിത്വാ ഗതാ തായ ഏവ രത്തിയാ മജ്ഝിമയാമേ കാലം കത്വാ താവതിംസഭവനേ തിംസയോജനികേ കനകവിമാനേ നിബ്ബത്തി. തസ്സാ പുബ്ബകമ്മപകാസനത്ഥം ചക്കമത്താനി സാഖപുപ്ഫാനി തത്ത തത്ഥ ഓലമ്ബന്തി. തേഹേവ സബ്ബം വിമാനം ഏകോഭാസീ [ഏകോഭാസി തതോ ഇതിസബ്ബത്ഥ] അഹോസി. തതോ സുഗന്ധകരണ്ഡകം വിയ ച അഹോസി, സാ പന അത്തനോ സോഭഗ്ഗപ്പത്തം അത്തഭാവഞ്ച വിമാനസമ്പദഞ്ച പരിവാരസമ്പത്തിയോ ച ദിസ്വാ വിമ്ഹിതമാനസാ പുബ്ബേ കതേന [പുബ്ബേകിസ്സമേ. പുബ്ബേകതേനമേ ഇതിചകത്ഥചി] കേന മേ പുഞ്ഞകമ്മേനാ യം ലദ്ധാതി ഓലോകന്തീ ഭഗവതോ ധാതുസരീരസ്മിം പൂജിതാനി തീണി സാഖപുപ്ഫാനി ദിസ്വാ പസന്നമാനസാ മഹാചക്കപ്പമാണം സാഖമാലം ഹത്ഥേന ധാരേന്തീ ധാതുപൂജനത്ഥായ അഗമാസി. തദാ തത്ഥ സന്നിപതിതാ മനുസ്സാ തസ്സാ രൂപസമ്പദഞ്ച ഹത്തേ മഹന്തം സാഖമാലഞ്ച ദിസ്വാ വിമ്ഹിതമാനസാ അമ്മ ത്വം കത്ഥ വാസികാ. കത്ഥ പനിമം പുപ്ഫം പടിലദ്ധന്തി പുച്ഛിംസു, തം സുത്വാ ദേവധീതാ അത്തനാ ഭഗവതോ ധാതുസരീരസ്സ പൂജിതസാഖമാലത്തയാനുഭാവേന പടിലദ്ധസമ്പത്തിയോ ച ദിബ്ബവിമാനഞ്ച പുബ്ബേ മതകലേവരം ചാതി സബ്ബം തേസം ദസ്സേത്വാ ധമ്മദേസനാവസാനേ ആഹ.

൧. സമാഗതാ ഭവന്താ ഭോ, പസ്സന്തു മമ സമ്പദം;

കതമപ്പേന കാരേന, സമ്മാസമ്ബുദ്ധധാതുയാ.

൨. സാഖമാലാനി തീണേവ, ഹീയ്യോഹം മുനിധാതുയാ;

പൂജയിത്വാന സന്തുട്ഠാ, നിവത്താ തായ രത്തിയാ.

൩. മരന്തീ ഖരവാതേന, തമഹം സുചരിതം സരിം;

തേനാഹം പുഞ്ഞകമ്മേന, താവതിംസൂപഗാഅഹും.

൪. തത്ഥ മേ ആസി പാസാദോ, തിംസയോജനമുഗ്ഗതോ;

കൂടാഗാരവരാകിണ്ണോ, സാഖമാലാതി [സാധമാലോ ഇതിപികത്ഥചി], വിസ്സുതോ.

൫. യഥാ സബ്ബസുഗന്ധേഹി, കരണ്ഡം പരിഭാവിതം;

തഥാ ദിബ്ബസുഗന്ധേഹി, ഗന്ധിതം ഭവനം മമ.

൬. ചക്കമത്താ സാഖപുപ്ഫാ, തത്ഥ തത്ഥൂപലമ്ബരേ [തതവത്ഥുപലബ്ബരേ ഇതിപികത്ഥചി];

ദിബ്ബഗന്ധാ പവായന്തി, മധുബ്ബഭനിസേവിതാ.

൭. ഭസ്സന്തി ഏകപുപ്ഫസ്മാ, തുമ്ബമത്താ ഹി രേണവോ;

തേഹി പിഞ്ജരിതാ ദേവാ, കീളന്തി ച ലലന്തിച.

൮. പീളന്ധിത്വാന മാലാധയാ, സുദിബ്ബാ ഭരണാനിച;

സഹച്ഛരാ ദേവപുത്താ, നച്ചഗീതാദിബ്യാവടാ.

൯. പസ്സഥേമം ഭുജങ്ഗാ ഭോ, സത്താ മോഹേന പാരുതാ;

ഹീയ്യോ മതം പവിദ്ധം മേ, പൂതിഭൂതം കലേവരം.

൧൦. പുളവേഹി സമാകിണ്ണം, മക്ഖികാഗണകീളിതം;

കാകസോണാദിസത്താന, മാഹാരം കുണപാലയം.

൧൧. പത്ഥേന്തി പുരിസാ പുബ്ബേ, അനേകോപായനേന തം;

ദട്ഠുമ്പിദാനി നിച്ഛന്തി, തണ്ഹായഞ്ഞാണതാ അഹോ.

൧൨. ലോകപജ്ജോതകസ്സാഹം, വിമലസ്സ യസസ്സിനോ;

ധാതും ഹീയ്യോ മഹിം സമ്മാ, അജ്ജ സഗ്ഗേ പതിട്ഠിതാ.

൧൩. ഹിത്വാനേ താദിസം കായം, ലദ്ധംദാനി മമേദിസം;

ദിബ്ബത്തഭാവം സോഭാഹി, ഭാസമാന മുദിക്ഖഥ.

൧൪. ഭാസമാനായ മേ വാചം, സുണോഥേത്ഥ സമാഗതാ;

നത്ഥേവാകതപുഞ്ഞസ്സ, അണുമത്തം ഭവേ സുഖം.

൧൫. ബിന്ദുമത്തമ്പി യോ പുഞ്ഞ, ബീജം രോപേതി സാസനേ;

ന ഹാ നത്ഥഫലം [നഹപനന്തഫലം ഇതിപികത്ഥചി] ഹോതി, യാവ നിബ്ബാണപത്തിയാതി.

ഏവം സാ ദേവതാ അത്തനാ പടിലദ്ധദിബ്ബവിഭവം ദസ്സേത്വാ ജനകായം ഓവദിത്വാ ദിബ്ബസാഖപുപ്ഫേഹി ജിനധാതും പൂജേത്വാ മനുസ്സാനം പസ്സന്താനംയേവ സദ്ധിം വിമാനേന ദേവലോകമേവ അഗമാസി. തം ദിസ്വാ മഹാജനോ ദാനാദീനി പുഞ്ഞാനി കത്വാ ദേവലോകം പൂരേസീതി.

൧൬. ഏവഞ്ഹി സാ പുപ്ഫമത്തേന ധാതും,

പൂജേത്വ ദേവേസു അലത്ഥ ഭൂതിം;

തുമ്ഹേപി ഭോന്തോ തിദിവേസു സാതം,

കാമത്ഥ ചേ കത്ഥ പുഞ്ഞാനി സാധുംതി.

സാഖമാലപൂജികായ വത്ഥും പഞ്ചമം.