൨൫. കവീരപട്ടന വത്ഥുമ്ഹി അയമാനുപുബ്ബീകഥാ

ജമ്ബുദീപേ കിര ചോളരട്ഠേ കാവീരപട്ടനം നാമ അഹോസി. തത്ഥ മാഹിസ്സരികാ ബഹൂ മിച്ഛാദിട്ഠികാ വസന്തി. തത്ഥേകസ്മിം ദേവാലയേ ചിത്തകമ്മം കരോന്താ ഏകസ്മിം ഫലകേ ഇസ്സരസ്സ ഓനമിത്വാ വന്ദനാകാരം ഭഗവതോ രൂപം അകംസു. തസ്മിം സമയേ തത്ഥ ബഹൂ ഉപാസകാ തം ദേവകുലം ഗന്ത്വാ തത്ഥ തത്ഥ ചിത്തകമ്മാനി ഓലോകേന്താ തസ്മിം ഫലകേ തം ചിത്തകമ്മം അദ്ദസംസു. ദിസ്വാന തേ അഹോ അമ്ഹേഹി അപസ്സിതബ്ബം പസ്സിതം. സദേവകേ ലോകേ സമാരകേ സബ്രഹ്മകേ സസ്സമണബ്രാഹ്മണിയാസദേവമനുസ്സായ പജായ ച അപരിമാണേസു ചക്കവാളേസു ഭഗവതോ ഉത്തരിതരം ഠപേത്വാ സമസമോപി നത്ഥി. സകലേഹി സത്തനികായേഹി വന്ദനീയോ പൂജനീയോ ഭഗവാ. അനനുരൂപം തസ്സ ഏതേഹി കതംതി രോദന്താ പരിദേവന്താ രാജദ്വാരം ഗന്ത്വാ ഉഗ്ഘോസേസും, തം സുത്വാ രാജാ തേ പക്കോസാപേത്വാ കസ്മാ തുമ്ഹേ ഉഗ്ഘോസേഥാതി പുച്ഛി, തേ ഏവ മാഹംസു. ദേവ അമ്ഹാകം ഭഗവാ ദേവാതിദേവോ സക്കാതിസക്കോ ബ്രഹ്മാതിബ്രഹ്മാ മേരുവ അചലോ സാഗരോ ഗമ്ഭീരോ ആകാസോവ അനന്തോ പഥവീവ പത്ഥടോതിആദീഹി ഭഗവതോ ഗുണം വണ്ണേസും. തേന വുത്തം അപദാനേ.

൧. ബത്തിംസലക്ഖണധരോ, സുനക്ഖത്തോവ ചന്ദിമാ;

അനുബ്യഞ്ജനസമ്പന്നോ, സാലരാജാവ ഫുല്ലിതോ.

൨. രംസിജാലപരിക്ഖിത്തോ, ദിത്തോവ കനകാചലോ;

ബ്യാമപ്പഭാപരിവുതോ, സതരംസി ദിവാകരോ.

൩. സോണ്ണാ നനോ ജിനവരോ, സമണീവ സിലുച്ചയോ;

കരുണാപുണ്ണഹദയോ, വിവട്ടോ വിയ സാഗരോ.

൪. ലോകവിസ്സുതകിത്തീവ, സിനേരുവ നഗുത്തമോ;

യസസാ വിതതോ ധീരോ, ആകാസസദിസോ മുനി.

൫. അസങ്ഗചിത്തോ സബ്ബത്ഥ, അനിലോ വിയ നായകോ;

പതിട്ഠാ സബ്ബഭൂതാനം, മഹീവ മുനിസുത്തമോ.

൬. അനൂപലിത്തോ ലോകേന, തോയേന പദുമം യഥാ;

കുവാദഗച്ഛദഹനോ, അഗ്ഗിക്ഖന്ധോവ സോഭതി.

൭. അഗദോ വിയ സബ്ബത്ഥ, കിലേസവിസനാസകോ;

ഗന്ധമാദനസേലോവ, ഗുണഗന്ധവിഭൂസിതോ.

൮. ഗുണാനം ആകരോ ധീരോ, രതനാനംവ സാഗരോ;

സിന്ധൂവ വനരാജീനം, കിലേസമലഹാരകോ.

൯. വിജയീവ മഹായോധോ, മാരസേനപ്പമദ്ദനോ;

ചക്കവത്തീവ സോ രാജാ, ബോജ്ഝങ്ഗരതനിസ്സരോ.

൧൦. മഹാഭിസക്കസങ്കാസോ, ദോസബ്യാധിതികിച്ഛകോ;

സല്ലകത്തോ യഥാ വേജ്ജാ, ദിട്ഠിഗണ്ഡവിഫാലകോ.

൧൧. സത്ഥാ നോ ഭഗവാ ദേവ, മഹാബ്രഹ്മേഹി വന്ദിതോ;

ദേവിന്ദസുരസിദ്ധേഹി, വന്ദനീയോ സദാ ദരാ.

൧൨. സബ്ബേസു ചക്കവാളേസു, യേ അഗ്ഗാ യേ ച പൂജിതാ;

തേസമഗ്ഗോ മഹാരാജ, ഭഗവാ നോ പതാപവാതി.

അയുത്തം ദേവ ദേവകുലേഹി കതംതി ആഹംസു. തം സുത്വാ രാജാ ഭോ സബ്ബേപി മനുസ്സാ അത്തനോ അത്തനോ ദേവതാനം മഹന്തഭാവം കഥേന്തി. തുമ്ഹാകം പന സത്ഥുനോ മഹന്തഭാവം കഥം അമ്ഹാകം ജാനാപേഥാതി, ഉപാസകാ ന ഗരു ത്വം മഹാരാജ ഫലകം ആഹരാപേത്വാ സുദ്ധവത്ഥേന വേഠേത്വാ തം അത്തനോ മുദ്ദികായ ലഞ്ഛിത്വാ സുരക്ഖിതസുഗോപിതേ ഏകസ്മിം ദേവകുലേ ഠപേത്വാ സത്താഹച്ചയേന ആഹരാപേത്വാ തം ഓലോകേഥ, തദാ നോ സത്ഥുനോ മഹന്താനുഭാവം ജാനാഥാതി ആഹംസു, അഥ രാജാ തേസം വുത്തനിയാമേനേവ കാരാപേത്വാ അന്തോദേവകുലേ ഠപേത്വാ സബ്ബദ്വാരാനി പിദഹിത്വാ ലഞ്ഛേത്വാ രക്ഖേയ്യാഥാതി നിയോജേസി. തതോ തേ ഉപാസകാ സബ്ബേ സന്നിപതിത്വാ സത്താഹം ദാനം ദേന്താ സീലം രക്ഖന്താ ഉപോസഥകമ്മം കരോന്താ സബ്ബസത്തേസു മേത്തിം ഭാവേന്താ സബ്ബസത്താനം അത്തനാ കതപുഞ്ഞേസു പത്തിം ദേന്താ തിണ്ണം രതനാനം പൂജം കരോന്താ ഏവം ഉഗ്ഘോസേസും. അമ്ഹാകം കതകുസലനിസ്സന്ദേന ലോകേ മഹിദ്ധികാ മഹാനുഭാവാ സബ്ബേ ദേവാ ച ലോകം പാലേന്താ ചത്താരോ മഹാരാജാനോ ച അമ്ഹാകം സത്ഥുനോ ഉപട്ഠാനായ [ഉപട്ഠായ ഇതിസബ്ബത്ഥ] ഠിതഭാവം ദസ്സേന്തൂതി സച്ചകിരിയം അകംസു. അഥ തേസം പുഞ്ഞാനുഭാവേന തസ്മിം ഖണേ സക്കസ്സ ദേവരഞ്ഞോ പണ്ഡുകമ്ബലസിലാസനം ഉണ്ഹാകാരം ദസ്സേസി. തതോ സോ മനുസ്സലോകം ഓലോകേന്തോ മിച്ഛാദിട്ഠീഹി കതം തം വിപ്പകാരം ദിസ്വാ സംവിഗ്ഗോ ആഗന്ത്വാ ഇസ്സരം ഭഗവതോ പാദേ വന്ദിത്വാ സയിതാകാരം കത്വാ തം പവത്തിം ഉപാസകാനം കഥേത്വാ സകട്ഠാനമേവ അഗമാസി. തതോ സത്തമേ ദിവസേപാതോവ തേ സബ്ബേപി രഞ്ഞോ സന്തികം ഗന്ത്വാ വന്ദിത്വാ ഏവമാഹംസു. ദേവ ഇസ്സരോ അമ്ഹാകം ഭഗവതോ പാദേ സിരസാ വന്ദിത്വാ നിപന്നോതി. അഥ രാജാ തേസം കഥം സുത്വാ നഗരേ ഭേരിം ചരാപേത്വാ മഹാജനേ സന്നിപാതേത്വാ തേഹി പരിവുതോ ദേവകുലം ഗന്ത്വാ ലഞ്ഛം ഭിന്ദാപേത്വാ ദ്വാരം വിവരിത്വാ ഫലകം ആഹരാപേത്വാ വേഠിതസാടകേ മോചാപേസി. അഥ രാജാ ച മഹാജനോ ച തം മഹന്തം പാടിഹാരിയം ദിസ്വാ മിച്ഛാദിട്ഠിം പഹായ സബ്ബേ സത്ഥുനോ സരണ മഗമംസു. അഥ രാജാ തം ദേവകുലം ഭിന്ദാപേത്വാ മഹന്തം രമണീയം വിഹാരം കാരാപേത്വാ യാവജീവം പുഞ്ഞകമ്മം കത്വാ ദേവലോകേ നിബ്ബത്തി.

൧൩. അനബ്ഭുതം സത്ഥു ധരീയമാനേ,

കരോന്തി ദിസ്വാ കുസലാനി ഇദ്ധിം;

യേ തം മുനിന്ദേ പരിനിബ്ബുതമ്ഹി,

കരോന്തി പുഞ്ഞാനി മഹബ്ഭൂതം യേതി.

കാവീരപട്ടനവത്ഥും പഞ്ചമം.