൨൦. സഹായസ്സ പരിച്ചത്തജീവിതകസ്സ വത്ഥുമ്ഹി അയമാനുപുബ്ബീകഥാ

ഭഗവതി പരിനിബ്ബുതേ സാവത്ഥിയം സോമബ്രാഹ്മണോ സോമദത്തബ്രാഹ്മണോതി ദ്വേ ബ്രാഹ്മണാ വസന്തി. തത്ഥ സോമദത്തബ്രാഹ്മണേന സദ്ധിം സോമബ്രാഹ്മണോ യേഭുയ്യേന ദൂതം കീളതി. അഥേകദിവസം സോമദത്തോ സോമബ്രാഹ്മണം തേന പരാജേത്വാ തസ്സ ഉത്തരാസങ്ഗഞ്ച ലഞ്ഛനമുദ്ദികഞ്ച ഗഹേത്വാ അത്തനോ ഗേഹം ഗച്ഛന്തോ സോമബ്രാഹ്മണസ്സ ഏഹി ഗേഹം ഗച്ഛാ- മാതി ആഹ. തതോ സോമോ നാഹം സമ്മ ഏകസാടകോ ഹുത്വാ അന്തരവീഥിം ഓതരിതും സക്കോമി. ഗമനതോ ഏത്ഥേവ മേ ഠാനം വരതരന്തി ആഹ, സോമദത്തേന ഏവം സതി സമ്മ ഇമം ഉത്തരാസങ്ഗം ഗണ്ഹാതി തസ്സ തം ദത്വാ ഇദാനി സമ്മ ഏഹീതി വുത്തോപി നാഗച്ഛതി. പുന തേന ഭോ കസ്മാ നാഗച്ഛസീതി പുട്ഠോ സമ്മ മമ ഹത്ഥേ മുദ്ദികം അപസ്സന്താ മേ പുത്തദാരാദയോ മയാ സദ്ധിം കലഹം കരോന്തീതി ആഹ, അഥ സോ ഏവം സന്തേ യദാ തേ പഹോതി. തദാ മയ്ഹം ദേഹീതി മുദ്ദികമ്പി ദത്വാ തം ഗഹേത്വാ ഗേഹം അഗമാസി. അഥ തേ ഏത്തകേന സഹായാ അഹേസും. അപരഭാഗേ സോമദത്തബ്രാഹ്മണം അയം പരദാരകമ്മം അകാസീതി മനുസ്സാ ഗഹേത്വാ രഞ്ഞോ ദസ്സേസും. രാജാ തസ്സ രൂപസമ്പത്തിം ദിസ്വാ രാജാണം അകത്വാ മാ ഭോ പുന ഏവമകാസീതി ഓവദിത്വാ വിസ്സജ്ജേസി. രാജാ നം യാവതതിയവാരം ഓവദന്തോ വിസ്സജ്ജേത്വാ ചതുത്ഥേവാരേ ഗച്ഛഥേതം ആഘാതനം നേത്വാ മാരേഥാതി ആണാപേസി. ഏവം പാപകമ്മേ നിരതാ അനേകാകാരേന ഓവദന്താപി ന സക്കാ നിവാരേതും. തഥാഹി.

൧. സോണാ ചേവ സിഗാലാ ച, വായസാ നീലമക്ഖികാ;

ഇച്ചേതേ കുണപേ സത്താ, ന സക്കാ തേ നിസേധിതും.

൨. തഥാ പാണാതിപാതേസു, പരദാരേ സുരായ ച;

മുസാവാദേസു ഥേയ്യേസു, സത്തസത്താ ന വാരിയാതി.

തതോ രാജപുരിസാ തം ബന്ധിത്വാ പക്കമിംസു. തദാ സോമബ്രാഹ്മണോ സോമദത്തം തഥാ നീയമാനം ദിസ്വാ കമ്പമാനഹദയോ രാജപുരിസാനം സന്തികം ഗന്ത്വാ ഇമം ഭോ മുഹുത്തം മാ മാരേഥ. യാവ രാജാനം ജാനാപേസ്സാമീതി വത്വാ രഞ്ഞോ സന്തികം ഗന്ത്വാ വന്ദിത്വാ ഠിതോ ദേവ മമ ജീവിതം സോമദത്തസ്സ ബ്രാഹ്മണസ്സ ദസ്സാമി. ഏതം മുഞ്ചഥ. യദി മാരേതുകാമാ, മം മാരേഥാതി ആഹ. രാജാ തുണ്ഹീ [തുട്ഠോ ഇതികത്ഥചി] അഹോസി, രാജപുരിസാ സോമദത്തം മുഞ്ചിത്വാ സോമബ്രാഹ്മണം ആഘാതനം നേത്വാ മാരേസും, അഹോ കതഞ്ഞുനോ കതവേദിതാ.

ഹോതി ചേത്ഥ.

൩. കകൂപകാര മത്താനം, സരന്താ കേചി മാനുസാ;

ജീവിതം ദേന്തി സോമോവ, സോമദത്തസ്സ അത്തനോതി.

സോ തേന ജീവിതദാനേന ദേവലോകേ നിബ്ബത്തിത്വാ മഹന്തേ കനകവിമാനേ ദേവച്ഛരാസഹസ്സപരിവുതോ ദിബ്ബസമ്പത്തിമനുഭോന്തോ പടിവസതി. തദാ സോമദത്തബ്രാഹ്മണോ ഏസോ മം മരണപ്പത്തം മോചേസീതി വത്വാ തസ്സത്ഥായ ദാനം ദത്വാ പത്തിം അദാസി. താവദേവസ്സ തതോ ബഹുതരം ദേവിസ്സരിയം അഹോസി ദേവാനുഭാവഞ്ച. തതോ സോ സോമദേവോ അത്തനോ ദേവിസ്സരിയം ഓലോകേന്തോ സഹായസ്സ അത്തനോ ജീവിതദാനം അദ്ദസ. ദിസ്വാ അത്തഭാവം വിജഹിത്വാ മാണവകവണ്ണേന സോമദത്തബ്രാഹ്മണം ഉപസങ്കമിത്വാ പടിസന്ഥാരം കത്വാ അത്താനം ദേവലോകേ നിബ്ബത്തഭാവം പകാസേത്വാ തം ഗഹേത്വാ അത്തനോ ആനുഭാവേന ദേവലോകം നേത്വാ യഥാകാമം സമ്പത്തി മനുഭവാതി വത്വാ സത്താഹം ദേവസ്സരിയം ദത്വാ സത്തമേ ദിവസേ നേത്വാ തസ്സ ഗേഹേയേവ പതിട്ഠാപേസി. തത്ഥ ഹി ദിബ്ബസമ്പത്തി മനുഭൂതസ്സ മനുസ്സസമ്പത്തി പടിക്കുലാ ഹോതി. തതോ സോ ദിബ്ബസമ്പത്തിമനുസ്സരന്തോ കിസോ ദുബ്ബലോ ഉപ്പണ്ഡുപ്പണ്ഡുകജാതോ അഹോസി. അഥേകദിവസം ദേവപുത്തോ തം ഓലോകേന്തോ തഥാ ദുക്ഖപ്പത്തം ദിസ്വാ ന സക്കാ മനുസ്സേന ദിബ്ബസമ്പത്തിമനുഭവിതുന്തി ഇച്ഛിതിച്ഛിതസമ്പത്തിദായകം ഏകം ചിന്താമണിം ദത്വാ തസ്സ ഭരിയമ്പി അത്തനോ ആനുഭാവേന രൂപവന്ഥം യസവന്തം വണ്ണവന്തം അതിക്കന്തമനുസ്സിത്ഥിവണ്ണം അകാസി, അപരഭാഗേ തേ ജയമ്പതികാ പച്ചക്ഖതോ ദിട്ഠദിബ്ബസമ്പത്തിവിഭവാ ദാനം ദത്വാ സീലം രക്ഖിത്വാ സഹായദേവപുത്തസ്സ സന്തികേയേവ നിബ്ബത്തിംസൂതി.

൪. മന്ദേന നന്ദിതമനാ ഉപകാരകേന,

പാണമ്പി ദേന്തി സുജനാ ഇതി ചിന്തയിത്വാ;

മിത്തദ്ദു മാ ഭവഥ ഭോ ഉപകാരകസ്സ;

പാസംസിയാ ഭവഥ സാധുജനേഹി നിച്ചംതി.

സഹായസ്സ പരിച്ചത്തജീവിതകസ്സ വത്ഥും ദസമം.

നന്ദിയരാജവഗ്ഗോ ദുതിയോ.